Մտավախություն կա, որ տրանսպորտային նոր ցանցի նախագիծը չի իրականացվի` կապված ավտոբուսների ձեռքբերման համար անհրաժեշտ գումարների և տրանսպորտի սակագնի հետ: Այս մասին այսօր կայացած մամուլի ասուլիսի ժամանակ ասաց «Սպառողների խորհրդատվական կենտրոն» ՀԿ նախագահ, Երևանի հասարակական տրանսպորտի բարեփոխումների մասնագիտական աշխատանքային խմբի անդամ Կարեն Չիլինգարյանը:

«Մեծ վարկ պետք է վերցվի ավտոբուսներ ձեռք բերելու համար, մոտ 100 մլն դոլարի մասին է խոսքը: Հարց է` արդյոք կկարողանա՞ մեր կառավարությունն այս գումարները բերել, թե ոչ»,- նշեց նա:

Նրա խոսքով՝ նախատեսված նախագծի քննարկումներն ավարտել են տարեվերջին, և այդ ժամանակ սկսել ավտոբուսների ներկրման գործընթացը:

Մյուս խնդիրը, Կարեն Չիլինգարյանի համոզմամբ, կարող է առաջանալ նոր տրանսպորտի սակագինը որոշելու հարցում:

«Մենք պայքարելու ենք, որ սակագինը չբարձրանա կամ չնչին բարձրանա: Կարող է մեկանգամյա երթևեկության համար այլ գին լինել, բազմամյայի համար` այլ: Նախագծով մոտ բնակչության 49 տոկոսն է մեկ տրանսպորտով հասնելու A կետից B կետ: Այս հարցի լուծման համար մենք ուզում ենք, որպեսզի Թբիլիսիի փորձը կիրառվի՝ մեկ անգամ վճարել և ժամ ու կես երթևեկել տարբեր գծերով»,- հայտնեց «Սպառողների խորհրդատվական կենտրոն» ՀԿ նախագահ:

Կարեն Չիլինգարյանը տրանսպորտի շարժակազմի կրճատումը դրական է համարում, քանի որ շահագործումից դուրս են գալու միկրոավտոբուսները և դրա փոխարեն լինելու մեծ և միջին տարողությամբ ավտոբուսներ: Հիմնական գծերում մինչև 150 տեղանոց ավտոբուսներ են շահագործվելու, իսկ երկրորդական գծերում միջին տարողության 50-55 տեղանոց ավտոբուսներ:

«Չեմ կարծում, որ մեծ ավտոբուսները խցանումների պատճառ կդառնան: Եթե երեք անգամ կրճատվում է տրանսպորտ քանակը, արդեն խնդիրներ չեն լինի: Բացի այդ, հստակ չվացուցակ է լինելու և այս ավտոբուսները իրար հետևից 2-3 կամ 5 րոպեն մեկ պետք է ժամանեն կանգառներ: Իսկ այսօր ինչպես է, միանգամից 5-10 երթուղային տաքսի և ավտոբուս միաժամանակ կանգառ է գալիս և խցանման պատճառ դառնում: Հենց տրանսպորտի անկանոն երթևեկությունն է խցանման պատճառը»,- ընդգծեց Չիլինգարյանը:

Նա դրական է համարում նաև տոմսային մեկ համակարգի ներդնումը: Վարորդն այլևս գումարի հետ առնչություն չի ունենա, իսկ ուղևորը վճարումը կկատարի էլեկտրոնային տարբերակով: