Ես մտահոգություն ունեմ, որ մարդիկ շատ են մտածում թանկացումների մասին։ Այս մասին այսօր՝ հունվարի 17-ին ԱԺ-ում լրագրողների հետ զրույցում հայտարարեց ՀՀԿ խմբակցության պատգամավոր, ԱԺ նախկին նախագահ Գալուստ Սահակյանը։

«Ես շատ լավ ճանաչում եմ իմ ժողովրդին եւ գիտեմ նրա ցանկությունն ինչ է։ Պարզապես ընդդիմություն է, փորձում է իր տեսակետն առաջ տանել»,-շեշտեց նա։

Հարցին, թե որն է ժողովրդի ցանկությունը, Գալուստ Սահակյանը պատասխանեց․ «Ժողովրդի ցանկությունն է, որ էժանություն լինի, մարդիկ լավ ապրեն, կարողանան խանութներից օգտվել»։

Նա նաեւ հավելեց, որ իշխանությունից չէ, որ գնաճն ավելանում է։ «Ամբողջ աշխարհում գնաճ կա։ Անցած տարի 5 տոկոս գնաճ ունեինք, այս տարի 2․5։ Մեր ժողովրդի այն մասը, որ շատ վատ է ապրում, նրանց համար սա էլ է մեծ բեռ։ Ժողովուրդը պետք է հասկանա, որ այստեղ պետությունն ու իշխանությունները չեն մեղավոր, այլ պետք է այնպիսի քայլեր մտածել, որ լուծվեն ժողովրդի խնդիրները»,-եզրափակեց պատգամավորը՝ նշելով, որ պետք է մտածի ժողովուրդը, պետությունը, իշխանությունները, իսկ մարդիկ պետք է գան, օգտվեն աշխատաշուկայից, թեկուզ ցածր աշխատավարձով։

ԱԺ պատգամավոր Գալուստ Սահակյանը խորհրդարանում անդրադարձավ իր եւ մի շարք կուսակցականների այն հայտարարություններին, թե Սերժ Սարգսյանն անփոխարինելի է եւ պետք է շարունակի պաշտոնավարել` որպես վարչապետ,այս անգամ նա նշեց, որ անփոխարինելի քաղաքական գործիչներ չկան:Լրագրողների հարցին, թե ում է նա տեսնում նախագահի պաշտոնում 2018 թվականից հետո՝ Սահակյանն պատասխանեց․ «Ինչ-որ մարդու տեսնում եմ, բայց ժամանակը չէ, որ արտահայտեմ, երբ կուսակցությունում քննարկվի այդ հարցը, նոր կհայտարարվի»։

«Ես անընդհատ մի ուրիշ բան եմ ասում, լրագրողները մի ուրիշ բան են ասում: Ես ժամանակի առումով ինչ-որ խնդիրներ դրել եմ, բայց այս պահին չեմ ուզում անդրադարձներ կատարել նույն խնդրին, որովհետեւ նաեւ այս պահերին քննարկումներ են գնում, թե ով պիտի լինի վարչապետ»,- ասաց պատգամավորը, ապա հավելեց.

«Քաղաքականության մեջ երբեւիցե Գալուստ Սահակյանն անփոխարինելի մարդ չի տեսնում: Ես ասում եմ` ժամանակաշրջանի մեջ մարդ կա, որ այդ գործը կարող է ավելի լավ կատարել»: