Հայաստանում համապատասխան պատժամիջոցներ են սահմանվում՝ չսահմանված ու չնախատեսված տեղերում եւ վայրերում աղբ թափելու համար։
Հայաստանի կառավարությունն այսօրվա նիստում հավանություն է տվել «Թափոնների մասին» ՀՀ օրենքում փոփոխություններ եւ լրացումներ կատարելու մասին», «Աղբահանության եւ սանիտարական մաքրման մասին» ՀՀ օրենքում փոփոխություններ եւ լրացումներ կատարելու մասին» եւ «Վարչական իրավախախտումների վերաբերյալ ՀՀ օրենսգրքում փոփոխություններ կատարելու մասին» ՀՀ օրենքների նախագծերի փաթեթի վերաբերյալ կառավարության օրենսդրական նախաձեռնությանը:
Նախագծի ընդունմամբ ակնկալվում է, մասնավորապես, բարելավել հանրապետության աղբահանության եւ սանիտարական մաքրման ծառայությունների որակը: ՀՀ բնակավայրերում աղբահանության վճարների վերլուծությունների արդյունքներով առաջարկվում է սահմանել նաեւ աղբահանության դրույքաչափի նվազագույն շեմը, ինչպես նաեւ ոչ բնակելի նպատակային նշանակության շենքերում եւ (կամ) շինություններում:
Առաջարկվում է նաեւ Վարչական իրավախախտումների վերաբերյալ ՀՀ օրենսգրքով համապատասխան պատժամիջոցներ սահմանել՝ չսահմանված ու չնախատեսված տեղերում եւ վայրերում աղբ թափելու համար: Առաջարկվում է նաեւ պատժամիջոցներ սահմանել համայնքի ղեկավարի սահմանած երթուղով շինարարական աղբը չտեղափոխելու կամ սահմանված կարգով հատկացված վայրում այն չտեղադրելու, տրանսպորտային փոխադրամիջոցից աղբ նետելու եւ այլ դեպքերի համար:
Մասնավորապես, ժամանակին աղբը չտանելու համար մունիցիպալ օրգանները տուգանվելու են 100-200 հազար դրամով, կրկնակի խախտման դեպքում՝ 200-300 հազա դրամով։
Աղբ թափելու համար, եթե այն չի գերազանցում 1 խմ-ն, ֆիզիակակն անձինք տուգանվելու են 20-30 հազար դրամ, իրավաբանական անձինք՝ 80-100 հազար դրամ։ 1 խմ-ն գերազանցելու դեպքում՝ ֆիզիկական անձինք կտուգանվեն 50-80 հազար դրամ, իրավաբանական անձինք՝ 150-200 հազար դրամ։
Տուգանք է լինելու նաեւ մեքենայից աղբ թափելու համար՝ 25 հազար դրամ, տնային կենդանիների թափոնները չմաքրելու համար՝ 10 հազար դրամ։