Ռուսական կուրատորների կողմից անզգուշություն է եղել Ադրբեջանին զենք վաճառելու հարցում, հաշվի չէին առնվել Ադրբեջանի ագրեսիվությունն ու նրա կողմից արվող հայտարարությունները՝ ԼՂ հիմնախնդիրը ռազմական ճանապարհով լուծելու հնարավորության մասին. լրագրողների հետ զրույցում, խոսելով Ռուսաստանի կողմից Ադրբեջանին զենք վաճառելու վտանգների մասին, այսպես ասաց ռուս վերլուծաբան, ԱՊՀ երկրների ինստիտուտի տնօրեն Կոնստանտին Զատուլինը:

«Դա պետք է կանգնեցներ զենք վաճառողներին: Այդպես լինում է. երկրի մի գերատեսչությունը, օրինակ՝ Արտաքին գործերի նախարարությունը, զբաղվում է հիմնախնդրի կարգավորմամբ, իսկ այլ գերատեսչություններ փորձում են զբաղվել իրենց ապրանքի վաճառքով,- ասաց նա։

Կոնստանտին Զատուլինը կարծում է՝ Ռուսաստանն արդեն եզրակացություններ արել է։ «Հայտնի է, որ Ադրբեջանին զենք վաճառելուց բացի, Հայաստան են մատակարարվել նորագույն զինատեսակներ՝ վարկով և շատ հարմար պայմաններով` տարածաշրջանը բալանսավորելու համար»,– ասաց նա:

ԱՊՀ երկրների ինստիտուտի տնօրենը նշեց, որ ինքը շատ է ափսոսում, որ ապրիլյան պատերազմից հետո այդ զենքի առուվաճառքի հետ կապված մտահոգությունները ստվերում են հայ-ռուսական հարաբերությունները: Նա հիշատակեց, որ ժամանակին Հայաստանում հանվեցին ռուս գրողների արձանները (օրինակ` Պուշկինի)՝ պատճառաբանելով, որ դրանք ազգի բանաստեղծները չեն: Նա նշեց, որ այդ մասին վաղուց արդեն մոռացվել է, և առաջարկեց Ռուսաստանի կողմից Ադրբեջանին զենք վաճառելն էլ համարել նման մի բան:

«Կարծում եմ՝ եզրակացություններ արվել են, և նման դիսբալանս տարածաշրջանում այլևս թույլ չի տրվի»,- ասաց նա: