«Սասնա Ծռեր» խմբի անդամ Պավլիկ Մանուկյանը Ավան և Նոր Նորք վարչական շրջանների ընդհանուր իրավասության դատարանի դատավոր Արտուշ Գաբրիելյանին անվանել է «Ցռան մոզի»: Լրատվամիջոցներն այս փաստը ֆիքսել էին դեռ հուլիսի 26-ին, այն դատական նիստի ժամանակ, երբ Մանուկյանն արտաբերեց իր այս պատմական արտահայտությունը: Բայց իրավապահներին 4 ամիս պահանջվեց ապացուցելու, որ հենց Պավլիկ Մանուկյանի շուրթերից է այն դուրս եկել, և նոյեմբերի 24-ին նրան նոր մեղադրանք առաջադրվեց՝ դատարանի նկատմամբ անհարգալից վերաբերմունք դրսևորելու համար: Մեր տեղեկություններով՝ այս 4 ամիսը փորձաքննության ժամկետն էր: Փորձաքննության հայոց հանճարները 4 ամիս ուսումնասիրել են Պավլիկ Մանուկյանի ձայնը ու եկել այն եզրակացության, որ «Ցռան Մոզի» ասողը հենց նա է եղել: Գործով տուժող չկա: Իրավապահ մարմիններում մեր աղբյուրը բացատրում է, որ Արտուշ Գաբրիելյանին տուժող ճանաչելը սխալ կլիներ, քանի որ սույն վիրավորական արտահայտությունն արվել է դատական նիստի ընթացքում, հետևապես հասցեատերը ոչ թե կոնկրետ անձն էր, այլ դատարանը:

Սրա հետ դժվար է համաձայնվել: Բանն այն է, որ գործը հարուցված է քրօրենսգրքի 343-րդ հոդվածի 3-րդ մասով, այն է՝ «Դատարանի նկատմամբ անհարգալից վերաբերմունքը, որը դրսևորվել է պաշտոնեական լիազորությունների իրականացման առնչությամբ՝ դատավորին վիրավորելով»:

Հոդվածի շարադրանքում հստակ օգտագործված է «դատավոր » բառը, այսինքն՝ տվյալ դեպքում խոսքը հենց անձի, այսինքն՝ Արտուշ Գաբրիելյանի մասին է: Հավանաբար, դատախազությունում հստակ գիտակցել են, որ եթե դատավորին տուժող ճանաչեն, ապա խնդրո առարկա անպարկեշտ անվանումը՝ «Ցռան մոզին», առհավետ կկապվի սույն դատավորի և նրա սերունդների և հետգայում կգրվի ՀՀ արդարադատության պատմության մեջ: Մինչդեռ Պավլիկ Մանուկյանն առանձնապես չի տուժի: Սույն արարքի համար ընդամենը տուգանք է սահմանված՝ նվազագույն աշխատավարձի երկուհարյուրապատիկից հինգհարյուրապատիկի չափով, կամ կալանք՝ երկուսից երեք ամիս ժամկետով:

Մանուկյանի շահերի պաշտպանները համաձայն չեն մեղադրանքի հետ և դեռ երկար պայքարելու են դրա դեմ, մանավանդ որ՝ Պավլիկ Մանուկյանը «Ցռան Մոզու» վերաբերյալ ոչ մի ցուցմունք չի տվել և չի պարզաբանել, թե ում է իր այդ հիշոցը՝ Գաբրիելյանի՞ն, թե՞ հայ արդարադատությանն առհասարակ, թե, օրինակ, մի պահ Մանուկյանը էմոցիոնալ վիճակի մեջ է ընկել և իրենց գյուղի մոզուն է մտաբերել, որի  նկատմամբ, գուցե, մանկուց համակրանք ու սեր է տածել:

Արցախի ռազմական եւ քաղաքական գործիչ, ԼՂՀ ԱԺ նախկին պատգամավոր, պատերազմի մասնակից Վահան Բադասյանը նույնպես գտնում է, որ ցռան մոզին վատ բան չէ: Նա մասին մի հին պատմություն հիշեց «Վարկած»-ի համար: « Մեր գյուղում մի մարդ կար, հաղթանդամ աշխատող, երեք տղա ուներ, բոլորը մարմնեղ: Էդ մարդը աշխատացնում էր իր տղերքին ու հետն էլ ասում էր՝ մոզի, հէէէէ: Ուզում էր ասել՝ եզի պես ուտող աշխատող են: Դա հայհոյանք չի: Հիմա Պավլիկը լավ իմաստով է ասել, փաղաքշական ձևով: Ես այդպես եմ հասկացել, ու կուզեի հարցնել մեղադրող դատախազին՝ իրանք ինչպե՞ս են  հասկացել»:

Սյուզան Սիմոնյան