Մոսկվայում բերման է ենթարկվել «ասիչ» Ստեփան Ավանեսյանը, ով մեղադրվում է առանձնակի խոշոր խարդախության համար: Այս մասին հայտնում է Комментатор-ը:

Ըստ հաղորդված տվյալների` Բաքվի բնիկ Ավանեսյանը, ներկայանալով Մոսկվայի փաստաբանական կոլեգիաներից մեկի նախագահի խորհրդական, գումարի դիմաց խոստացել էր փակել Լերմոնտով քաղաքում «Հիդրոմետալուրգիական գործարան» ԲԲԸ ղեկավարության դեմ քրեական գործը։ Հանցագործին բերման են ենթարկել, այն ժամանակ, երբ Ստեփանը ստանում էր գումարի մի մասը` 20 մլն ռուբլի: Ընդհանուր առմամբ Ավանեսյանը նախատեսում էր ստանալ 160 մլն ռուբլի:

ՌԴ ՆԳՆ պաշտոնական ներկայացուցիչ Իրինա Վոլկը նշում է, որ չարագործն առաջարկել է օգնել՝ խոստանալով գումար փոխանցել իրավապահ մարմիններին գործը փակելու դիմաց, սակայն իրականում նա նման իրավասություն չէր կարող ունենալ:

Ինքը՝ Ստեփան Ավանեսյանը, օպերատիվ մարմիններին ներկայացել է որպես №1 փաստաբանական կոլեգիայի նախագահ Արթուր Հովսեփյանի խորհրդական։ Հետաքրքիրն այն է, որ Ավանեսյանը կարող էր իրոք կապ ունենալ քիմիական արդյունաբերության հետ։ Ըստ որոշ տեղեկությունների՝ նա Մոսկվայում կոմերցիոն ընկերության համահիմնադիր էր, որը զբաղվում էր օրգանական քիմիական նյութերի արտադրությամբ և իրացմամբ

Մեղադրյալը և իր դատապաշտպանը բողոքում էին կալանավորման դիմաց` նշելով, որ կալանավորման համար բավարար հիմքեր չկան: Սակայն դատարանը համաձայնել է դատախազական կողմի հետ` այն մասին, որ Ավանեսյանը ազատ արձակվելով կարող է փախչել, կամ վերացնել ապացույցները:

Նրան կալանավորել են հետախուզական մեկուսարանում, որտեղ նա կմնա մինչև նոյեմբերի 12-ը: