Արմավիրի մարզում երեխայի վաճառքի եւ միաժամանակ առեւանգման մասին հաղորդումների առնչությամբ ՀՀ ոստիկանությունը կատարում է հետաքննություն:

Լրատվական ծառայությունից տեղեկացանք, որ սույն թվականի սեպտեմբերի 22-ին ոստիկանության Վաղարշապատի բաժնում հաղորդում է ստացվել Իննա Ղ.-ից: Նա հայտնել է, որ վեց ամիս առաջ մի կին հրաժարվել է իր երեխայից, տվել իրեն եւ պահանջել 20 հազար դրամ՝ երեխայի փաստաթղթերի հետ կապված խնդիրները լուծելու, ծննդյան վկայական տալու համար, սակայն հիմա եկել եւ 55 հազար դրամ է պահանջում նույն հարցի համար:

Նյութեր նախապատրաստելու ընթացքում պարզվել է, որ ապրիլի 6-ին Իննան, երեխա որդեգրելու նպատակով, այցելել է երեխայի մոր՝ Գյուլիզար Գ.-ի տուն, որտեղ նրանք համաձայնության են եկել: Նույն նյութեր նախապատրաստելու ընթացքում երեխայի մայրն էլ հաղորդում է տվել, որ փոքրիկին ապրիլ ամսին առեւանգել են: Նա նշել է, որ ապրիլի 3-ին Երեւան քաղաքի Մարգարյան փողոցում՝ «Հանրապետական» ծննդատան մոտակայքում, պատահական տաքսի ավտոմեքենայի մեջ գտնվող իր նորածին երեխային անհայտ անձինք առեւանգել են:

Ոստիկանության Վաղարշապատի բաժնում սկսվել է հետաքննություն: Քրեական գործ դեռեւս հարուցված չէ:

Երեխայի առք ու վաճառքը քրեորեն պատժելի արարք է: Քրեական օրենսգրքի 168-րդ հոդվածն այսպիսի գլխագիր ունի. «Խնամքը ստանձնելու նպատակով երեխայի առքը կամ ստանձնողի խնամքին հանձնելու նպատակով երեխայի վաճառքը»: Այսինքն, պատասխանատվություն է նախատեսվում երկու կողմերի համար էլ:

« Խնամքը ստանձնելու նպատակով երեխայի առքը կամ ստանձնողի խնամքին հանձնելու նպատակով երեխայի վաճառքը պատժվում է ազատազրկմամբ՝ երկուսից հինգ տարի ժամկետով»,- ասվում է մեջբերված հոդվածի 1-ին մասում:

Նորածին երեխայի խնամքը ստանձնած ամուսիններն ապրում են Վաղարշապատ քաղաքում: Մայրը մարզի գյուղերից մեկի բնակիչ է:

Նշենք, որ էլեկտրոնային լրատվամիջոցներում տեղեկություն կար, որ երեխայի խնամակալության հետ կապված առկա է Վաղարշապատի հոգաբարձուների խորհրդի որոշում: Քաղաքապետարանի լրատվական ծառայությունից մեզ պատասխանեցին, որ քաղաքապետարանում գործում է խնամակալության հանձնաժողով, իսկ նշված խնդիրն այդ հանձնաժողովի իրավասությունների ոլորտում չէ: Վաղարշապատի քաղաքապետարանից այդուհանդերձ տեղեկացրին, որ վերոնշյալ անձինք այդ հանձնաժողովին չեն դիմել:

Արմավիրի մարզպետարանի աշխատակազմի ընտանիքի, կանանց եւ երեխաների իրավունքների պաշտպանության բաժնի պետ Ասթինե Ապիտոնյանը մեր զրույցում ասաց, որ դեպքի մասին ինքը տեղյակ է: Օրեր առաջ պարզել է, որ Դմիտրիի եւ Իննայի ընտանիքում երեխա կա: Ամուսիններն, ի դեպ, երկար տարիներ երեխա չեն ունեցել: 45-ամյա Դմիտրին եւ 33-ամյա Իննան մեծացել են մանկատանը:

Ըստ տիկին Ապիտոնյանի, նրանք վստահեցրել են, որ փոքրիկի մայրն իրենց բարեկամուհին է, դա նրա 8-րդ երեխան է, ընտանիքն ապրում է չափազանց ծանր սոցիալական պայմաններում, եւ մայրը ցանկացել է, որ որդեգրեն նորածնին:

Մարզպետարանի աշխատակիցը ամուսիններ Դմիտրիից եւ Իննայից պահանջել է ներկայացնել երեխայի օրինականության փաստաթղթերը: Ասաց, որ չստանալու դեպքում նա ինքն էր պարտավորված լինելու դիմել ոստիկանություն:

«Իրենք մեր շահառուներն են, նորմալ մարդիկ են, լավն են, կուզենայի, որ գտնեն իրենց երջանկությունը»,- նշեց Արմավիրի մարզպետարանի աշխատակիցը: