Առողջապահության նախարարությունը  երեկ հայտարարություն է տարածել, որում անդրադարձել է «Գարդասիլ» պատվաստանյութով 13 տարեկան աղջիկների պատվաստմանը: Հայտարարության  մեջ պատկան կառույցը հերքում է պատվաստման վտանգավորության մասին բոլոր միֆերը: Առաջին հայացքից թվում է, թե հոդվածում տեղ գտած տեղեկությունները նախարարության ուսումնասիրության արդյունքն են: Սակայն բավական է 13 տարեկան աղջիկների  պատվաստման մասին  տեղեկություն փնտրել համացանցում, եւ կհայտնաբերես  ԱՆ հրապարակած տեղեկատվության ռուսերեն տարբերակը, որը հրապարակվել է 2014 թ.:  Տպավորությունն այն է, որ նախարարությունը սեփական հետազոտության փոխարեն թարգմանել է ռուսական հոդվածը եւ փորձել հակադարձել պատվաստմանը դեմ եղողներին, փարատել  մարդկանց անհանգստությունը:

Հետաքրքիրն այն է, որ Ռուսաստանում 13 տարեկան աղջիկներին արգանդի վզիկի քաղցկեղի պատվաստելը պարտադիր չէ:

Հայաստանում դեմ եղողների մտահոգությունն այնքան էլ անտեղի չէ:  ԱՄՆ-ի կառավարության VAERS տվյալների բազայի համաձայն՝ գրանցվել է HPV պապիլոմա վիրուսի դեմ պատվաստանյութի կողմնակի ազդեցությունների ավելի քան 50 հազար դեպք: Մարդկանց մոտ առաջացել են` անպտղություն, վերարտադրողական ֆունկցիայի խանգարումներ, վիժումներ, մկանային ցնցումներ, նյարդային համակարգի խանգարումներ, արյան ճնշման փոփոխություններ, գլխացավեր, հոդացավեր եւ այլն:

Araratnews.am-ը փորձեց մի քանի  բժիշկներից՝ գինեկոլոգներից, պարզել, թե որքանո՞վ են մտահոգություններն արդարացված, սակայն նրանք հրաժարվեցին խոսելուց, ասելով, թե խնդրին այդքան էլ տեղյակ չեն: Հասկանալի է,  որ առողջապահության ոլորտի աշխատակիցները չեն ուզում անցավ գլուխը ցավի տակ դնել ու խնդիրներ ունենալ առողջապահության նախարարության  հետ:

Սակայն մեզ հաջողվեց զրուցել գինեկոլոգներից մեկի հետ, որը համաձայնեց մասնագիտական կարծիք հայտնել, եթե իր անունը չհրապարակվի: Համաձայնեցինք, քանի որ  նախարարությունը պնդում է՝ մինչ օրս, բացի, էմոցիոնալ գնահատականներից, մասնագիտական հիմնավորված  փաստարկ չի հնչել: Եվ այսպես, ըստ մասնագետի`

1. պատվաստումը չի օգնի նրանց, ովքեր արդեն կրում են պապիլոմա վիրուսը:

2. Եթե օրգանիզմը կարող է հաղթահարել այդ վիրուսը, առանց պատվաստման էլ կպայքարի:

3. Պատվաստումը չի կարող փոխարինել կանոնավոր բժշկական զննությանը արգանդի պարանոցի պաթոլոգիայի  տեսանկյունից, հետեւաբար, պատվաստանյութը 100 տոկոսով չի պաշտպանում պարանոցը:

4. Դեռ պարզ չէ` «Ցերվարիքս» («Գարդասիլ»)  պատվաստանյութը մարդուն պաշտպանում է ամբողջ կյանքի՞ ընթացքում, թե՞ կարիք կլինի կրկնակի պատվաստման,  քանի՞ անգամ կարելի է պատվաստում անել՝ առանց առողջությունը վնասելու:

5. Ինչպե՞ս է ազդում պատվաստանյութն այն տարիքային խմբերի վրա, որոնք չեն ուսումնասիրվել 9-16, 16-26-49 տարեկանում:

6. Արդյոք կարելի՞ է պատվաստել այն կանանց, որոնք  պապիլոմա վիրուսակիր են,  կազմում են 70 տոկոս,  ապրում են ակտիվ սեռական կյանքով:

7. Արդյոք պատվաստանյութը  չի՞ կարող բերել օրգանիզմում պապիլոմա վիրուսի մուտացիայի և արգանդի չարորակ գոյացության առաջացման:

Թվում է, թե պրակտիկորեն կարելի է պատվաստել բոլորին՝ առանց բացառության, առանց ուսումնասիրության և հետազոտությունների, բայց դա ճիշտ չէ, քանի որ պատվաստանյութի անվտանգության ապացույցներ չկան:

Բժշկի խոսքով՝ ամերիկացի գիտնականներն ապացուցել են՝ պատվաստանյութը հանգեցնում է չբերության:

araratnews.am