ՌԴ ԱԳՆ պաշտոնական ներկայացուցիչ Մարիա Զախարովան երեկ ուշագրավ հայտարարությամբ է հանդես եկել:  Առաջին անգամ ՌԴ ԱԳՆ ներկայացուցիչը խոսելով Արցախի հետ շփման գծում տեղի ունեցած միջադեպի մասին հասցեականհայտարարություն է արել՝ մեղադրելով Ադրբեջանին հրադադարի ռեժիմը խախտելու մեջ: Զախարովան հայտարարել է. «Տարբեր աղբյուրներից ստացված տեղեկություններով՝ մայիսի 15-ի կեսօրին, ադրբեջանական կողմը գնդակոծել է շփման գծի մյուս կողմում գտնվող ռազմական օբյեկտը, ինչին համապատասխանաբար արձագանք է տվել մյուս կողմը»,- ասել է ՌԴ ԱԳՆ ներկայացուցիչն` ընդգծելով, որ միջադեպի ժամանակ գրանցված զոհերի մասին երկկողմ տվյալները հակասում են իրար:

ՌԴ ԱԳՆ հայտարարությունից բացի, հասցեական հայտարարությամբ հանդես եկան նաև Մինսկի խմբի համանախագահները: Նրանք ևս իրենց հայտարարության մեջ  նկատում են, որ սադրիչ գործողությունների դիմել է ադրբեջանական կողմը. «Տարբեր վստահելի աղբյուրներից հավաքած տեղեկության համաձայն՝ Ադրբեջանը մայիսի 15-ին շփման գծում հրթիռ է արձակել՝ ոչնչացնելով ռազմական տեխնիկա։ Մայիսի 16-ի երեկոյան և մյուս օրը հայկական զինված ուժերը պատասխանել են տարբեր տրամաչափի ականանետային կրակահերթերով։ Երկու կողմերի նման գործողությունները հրադադարի ռեժիմի լուրջ խախտում ու տագնապի պատճառ են»,-ասվում է համանախագահների հայտարարության մեջ:

Սրանք իսկապես աննախադեպ հայտարարություններ են և փորձագիտական որոշակի շրջանակների կարծիքով փորձ են Ադրբեջանին հետ պահել լայնածավալ ռազմական գործողություններից:  Այս հայտարարությամբ արձանագրվում է, որ հրադադարի ռեժիմը խախտել է Ադրբեջանը և եթե լայնածավալ գործողություններ սկսկեն, ապա համանախագահները նախկինի նման անհասցե հայտարարություն չեն անի, այլ կոնկրետ փաստերի վրա հենվելով, կմեղադրեն նախահարձակ կողմին՝ այս դեպքում Ադրբեջանին:

Միայն լուրջ սպառնալիքի դեպքում, համանախագահները կգնային նման քայլի և ամենայն հավանականությամբ լայնածավալ գործողությունների վերսկսման վտանը այս օրերին բավական մեծացել է ու համանախագահները փորձում են կանխարգելել այն:

politik.am