Տասը օր առաջ Երեւանում ծնված հնգյակից կենդանի մնացած երկու աղջիկների վիճակը շարունակում է մնալ կայուն ծանր, իսկ տղայի վիճակն այս գիշեր ավելի է վատացել, սակայն բժիշկներին հաջողվել է կայունացնել վիճակը։ Այս մասին armtimes.com-ին տեղեկացրեց Մուրացան բժշկական համալիրի տնօրեն Բագրատ Բավեյանը։

«Մեզ մոտ գտնվող տղա երեխայի վիճակը շարունակում է ծայրահեղ ծանր մնալ։ Գիշերը ես եղել եմ հիվանդանոցում, երեխայի վիճակը մի փոքր ավելի վատացավ, հետո հնարավոր եղավ կայունացնել,-ասում է բժիշկը՝ հավելելով, որ անհաս երեխաների պարագայում իրավիճակն անկանխատեսելի է եւ բուժման ընթացքը շատ ծանր է,-հատկապես, որ մի պտուղ չի, միանգամից հինգ պտուղ է ձեւավորված եղել, ինչը մի քանի անգամ բարդացնում եւ ծանրացնում է ծնվածների վիճակը»։

«Սուրբ Աստվածամայր» ԲԿ-ի վերակենդանացման բաժանմունքի վարիչ Աննա Չոբանյանն էլ armtimes.com-ին ասաց, որ իրենց մոտ գտնվող աղջկա վիճակը կայուն է։

«Տարբեր բաներ ենք փոփոխել իրեն միացված ապարատուրայում, ավելի թեթեւացրել ենք, շնչում է ինքնուրույն, 60 գրամ քաշ է ավելացրել, 12 գրամ կեր ենք տալիս,-ասաց բժշկուհին՝ հավելելով, որ այս պահին ապագայի մասին դեռեւս վաղ է խոսելը,-կանխատեսումներ չենք կարող անել, կարող ենք միայն այսօրվա փաստն արձանագրել։

Երեխաների հայրը՝ Վարդան Կարապետյանն էլ ասաց, որ տեսել է երեխաներին, ամեն բան նորմալ է։

«Շողակաթ» հեռուստաընկերության «Եկեղեցական կյանք» հաղորդման հետ զրույցում փոքրիկների մայրն ասել է, որ ծննդաբերությունից 8 օր անց՝ մայիսի 11-ին, տեսել է փոքրիկներին։

«Շատ ուրախացա, շատ-շատ էի սպասում այդ հանդիպմանը: Թաթիկին կպա, անբացատրելի է զգացողությունը, թե ինչ զգացի»,-ասել է 23-ամյա Լուսինե Պողոսյանը։

Հիշեցնենք, որ մայիսի 3-ին Երեւանում ծնվել էր հնգյակ՝ տղա եւ չորս աղջիկ, որից երկու աղջիկը ծնվելուց օրեր անց մահացել էին:

Ծնվելուց անմիջապես հետո երեխաները տեղափոխվել էին տարբեր բժշկական կենտրոններ՝ վերականգնումն արագ կազմակերպելու նպատակով:

armtimes.com