«Երկիր Ծիրանին» 51 տոկոսից ավելի է ստանալու Երեւանի ավագանու ընտրություններում, հետեւաբար ես քաղաքապետ դառնալու եմ: Այս մասին, այսօր՝ մայիսի 4-ին, Ավան թաղամասում քարոզարշավի ժամանակ հայտարարել է «Երկիր Ծիրանի» կուսակցության կողմից Երեւանի քաղաքապետի թեկնածու Զարուհի Փոստանջյանը:

«Մեր հանրային գումարները վերածվում են այսպիսի տների, դղյակների: Եկել ենք, որպեսզի այդ ոչ համարժեք եկամուտներով ձեռք բերված տունը ցույց տանք. համեմատեք իր ստացած աշխատավարձն ու տունը: Այն, ինչ նա հայտարարագրել է և աշխատավարձ է ստացել այս տարիների ընթացքում՝ անհամատեղելի են: Ափսոս, որ քաղաքապետը ոչ թե քաղաքի, այլ իր անձնական բարեկեցության մասին է մտածում: Մենք քիչ այն կողմ տեսանք քանդած ճանապարհները: Բարձրաստիճան պաշտոնյա լինելու տասը տարի ժամանակահատվածում իմ տունը չի փոխվել, եթե քո երկրում կա շուրջ 35 տոկոս աղքատություն, դու այսպիսի տուն ունենալու իրավունք չունես»,-ասաց Զարուհի Փոստանջյանը:

Հարցին, թե արդյոք համաձայն է տեսակետին, որ Ավանն ավելի բարեկարգ է եւ տարբերվում է մյուս վարչական շրջաններից, «Երկիր Ծիրանի»-ի ղեկավարը պատասխանեց. «Ես համաձայն չեմ: Ճիշտ է, կան մի քանի պուրակներ կամ, կարելի է ասել, ինչ-որ ծաղիկներ՝ դեկորատիվ։ Գուցե էսթետիկ առումով հաճելի են, բայց իրականում ողջ քաղաքը նույն վիճակում է, բակերը քանդված են, շենքերը նորոգման կարիք ունեն: Հասկանալի է, որ ոչինչ չի արվել քաղաքում 25 տարի: Մասնավորապես, Տարոն Մարգարյանը մեր հանրային գումարները յուրացրել է»:

«Ես դառնալու եմ քաղաքապետ ու այս խարդախությանն ու խաբեբայությանը վերջ է տրվելու: Մենք գնում ենք գրավելու քաղաքապետարանը: Միակ տարբերակը դա է»,- վստահեցրեց Զարուհի Փոստանջյանը: