Հավանականությունը, որ սոցիալապես անապահով ընտանիքների երեխաները կհայտնվեն առաջնագծում, օբյեկտիվորեն բարձր է: Այսօր, լրագրողների հետ հանդիպմանը, բանակում արդարությունը վերականգնելու մասին հարցին ի պատասխան, այս մասին հայտարարեց Պաշտպանության նախարար Վիգեն Սարգսյանը: Նա պնդեց նաև, որ չգիտի, թե քանի օլիգարխի երեխա է ծառայում առաջնագծում, քանի որ «օլիգարխ» իրավական հասկացություն չկա:

«Եթե մենք ելնում ենք նրանից, որ մեր հասարակության կեսը, ինչպես երբեմն ասում են մեր ընդդիմադիր ուժերը, և կեսից ավելին, ծայրահեղ աղքատ է, ուրեմն մենք պետք է հասկանանք, որ առաջնագծում ծառայող երիտասարդների առնվազն կեսը ևս ծայրահեղ աղքատ ընտանիքներից է:

Հավանականությունը, որ սոցիալապես անապահով ընտանիքի երեխան հայտնվելու է առաջանագծում, ի սկզբանե օբյեկտիվորեն ավելի բարձր է, որովհետև ավելի ապահով ընտանիքի երեխան ավելի հավանական է, որ ընդունվել է ԲՈւՀ: Երբ ինքը գալիս է հավաքակայան, ինքը ունի նախընտրություն ուսումնական զորամասի, մասնագիտական ծառայության՝ տանկիստ, հրետանավոր և այլն, և հնարավորությունը, որ նա կհայտնվի առաջնագծում, խրամատում, ավելի ցածր է, օբյեկտիվորեն, մինչև վիճակայանությունը»,- ասաց պաշտպանության նախարարը:

Օրեր առաջ Հայաստանի զինված ուժերի գլխավոր շտաբի նախկին պետ Յուրի Խաչատուրովը նշանակվեց ՀԱՊԿ գլխավոր քարտուղար: Արդյո՞ք այս նշանակումից հետո Ռուսաստանի գլխավորած ռազմական այդ դաշինքն ավելի հասցեական կարձագանքի կազմակերպության անդամ Հայաստանի դեմ գործողություններին: Այս հարցին ի պատասխան, պաշտպանության նախարարը նշեց՝ ՀԱՊԿ նախկին գլխավոր քարտուղար Նիկոլայ Բորդյուժայի հայտարարությունները ևս «ադեկվատ էին»:

«Հայաստանի քաղաքացի գլխավոր քարտուղար ունենալը, ինչքան խնդրի լուծում է, այնքան էլ, միաժամանակ, կարա խնդրի բարդացում լինի, որովհետև ՀԱՊԿ գլխավոր քարտուղար, Ռուսաստանի քաղաքացի Նիկոլայ Բորդյուժայի հայտարարությունը այլ քաշ և այլ ընկալում ուներ, քան Հայաստանի քաղաքացի գլխավոր քարտուղարի որևէ պոտենցիալ, արվելիք հայտարարություն: Հասկանալի է չէ՞, որովհետև շատերի համար ընկալումը լինեու է, որ դա Հայաստանի քաղաքացի է՝ բա ինչ պիտի ասեր: Թեև ինքը, որպես Հայաստանի քաղաքացի չի այդ պաշտոնում, ինքը միջազգային չինովնիկ է և ունի իր սահմանափակումները, իր կարգավորումները»,- մանրամասնեց նախարարը:

Խորհրդարանական ընտրություններին իշխող Հանրապետականի ցուցակը գլխավորած Սարգսյանը նաև հույս հայտնեց, որ նոր ձևավորվելիք կառավարությունում ևս կզբաղեցնի պաշտպանության նախարարի պաշտոնը․ «Ուզում եմ շարունակել՝ ծառայել իմ երկրին պաշտպանության նախարարի պաշտոնում: Ես կարծում եմ, որ իմ կուսակցությունը՝ Հայաստանի հանրապետական կուսակցությունը ինձ թույլ կտա, հնարավորություն կտա՝ դա անելու: Կարծում եմ, որ սա այն տեղն է, որտեղ ես կարող եմ օգտակար լինել և փորձելու եմ ամեն ինչ անել՝ այդ օգտակարությունն առավելագույնի հասցնելու: Եթե հաջողեմ՝ կլինեմ մեր երկրի ամենաերջանիկ քաղաքացիներից մեկը»:

Իսկ այն հարցին, թե ինչով է զբաղվելու Սերժ Սարգսյանը նախագահի պաշտոնը թողնելուց հետո՝ նախագահի աշխատակազմի նախկին ղեկավարը պատասխանեց․ «Եթե լիներ որոշում, որե ենթակա է հանրայնացման, մենք հաստատ ձևը կգտնեինք՝ դրա մասին խոսելու: Եթե չենք խոսել, ուրեմն այս պահին հանրայնացման ենթակա որոշում չկա»:

azatutyun.am