Վրաստանից «Իգլա»-ի տեղափոխման քրեական գործի շրջանակներում ԼՂՀ պաշտպանության բանակի նախկին հրամանատար Սամվել Բաբայանի հետ կալանավորված Սանասար Գաբրիելյանի բողոքի քննության օր Վերաքննիչ դատարանը դեռևս չի նշանակել:

Aysor.am-ի թղթակցի հետ զրույցում Գաբրիելյանի պաշտպան, փաստաբան Կարապետ Աղաջանյանը կարծիք հայտնեց, թե, հավանաբար, նախատեսում են ավարտել Սամվել Բաբայանի բողոքի քննությունը, հետո միայն անցնել գործով մյուս կալանավորվածին:

Նշենք, որ Սամվել Բաբայանի բողոքի քննությունը Վերաքննիչ դատարանում կայանալու է ապրիլի 20-ին:

Անդրադառնալով քրեական գործով իրականացվող քննչական գործողություններին՝ Աղաջանյանն ասաց, որ փորձաքննությունների եզրակացություններին է ծանոթացել և հավելեց.

«Փորձաքննությունների բովանդակությունը չեմ կարող ներկայացնել՝ հաշվի առնելով նախաքննական գաղտնիությունը, սակայն կարող եմ ասել, որ դրանք հօգուտ իմ պաշտպանյալի են: Մինչ այս պահը, այսինքն, լրացուցիչ որևէ ապացույց չի ներկայացվել, որը կհիմնավորեր իմ պաշտպանյալի մեղքը»:

Հիշեցնենք՝ Հայաստան Վրաստանից «Իգլա» տեսակի զենիթա-հրթիռային համալիր տեղափոխելու փաստի առթիվ ԱԱԾ-ում հարուցված քրեական գործի շրջանակներում կալանավորվել էին երեք անձ, որոնցից հայտնի են միայն երկուսը՝ Սամվել Բաբայանը և նրա մարտական ընկեր Սանասար Գաբրիելյանը:

Նրանց բոլորին առաջադրվել է միևնույն մեղադրանքը՝ ՀՀ Քրեական օրենսգրքի 235 հոդվածի 2-րդ մասի հատկանիշներով՝ «Նախնական համաձայնությամբ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը» և 235.1. հոդվածի 2-րդ մասի 1-ին կետի հատկանիշներով՝ «Նախնական համաձայնությամբ Եվրասիական տնտեսական միության մաքսային սահմանով կամ Հայաստանի Հանրապետության պետական սահմանով խիստ ներգործող, թունավոր, պայթուցիկ, ռադիոակտիվ նյութերի, ճառագայթման աղբյուրների, միջուկային նյութերի, հրազենի կամ նրա բաղկացուցիչ մասերի, ռազմավարական տեսակետից կարևոր հումքային ապրանքների կամ մշակութային արժեքների մաքսանենգությունը»:

aysor.am