Լուրեր էին շրջանառվում Արագածոտնի մարզում Հանրապետական կուսակցության ռեյտինգային ցուցակով առաջադրված պատգամավորության թեկնածու Բազմասեր Առաքելյանի աջակիցների կողմից առաջիկա ընտրություններում Դաշնակցության օգտին քվեարկել պատրաստվող քաղաքացուն Բազամասեր Առաքելյանի տուն հրավիրելու և նրան ծեծի ենթարկելու մասին: Այդ և մի շարք այլ հարցերի շուրջ զրուցեցինք Բազմասեր Առաքելյանի հետ.

-Ձեր նախընտրական քարոզչությունը բացասական երանգներով սկսվեց։ Ըստ Ձեզ` Ինչո՞ւ:

— Պատճառն իմ բարձր վարկանիշն է, բայց հաշվարկների մեջ սխալվել էին: Չերչիլյան խոսք կա`«Սև փիառն էլ փիառ է», ու իմ դեպքում իրենց հաշվարկած սև փիառը հակառակ ազդեցություն ունեցավ ։ Իմ վարկանիշը ավելի բարձրացավ:

—Նախկին մարզպետ Սահակյանի հետ Դուք սկզբում բարիդրացիական և շատ մտերմիկ հարաբերությունների մեջ եք եղել: Ի՞նչն է պատճառը, որ աշխատանքի ընթացքում ձեր հարաբերությունները սրվեցին:

-Ես այն մարդկային տեսակին եմ պատկանում, որ երբևիցե ոչ մեկի հետ վատ հարաբերություն չունեմ:

—Բայց չէ՞ որ Դուք մարզիկ եք, և պայքարի ոգին Ձեր մեջ չի կարող չլինել:

-Ես իմ ամբողջ կյանքում եմ պայքարի մեջ: Մինչև 20-30 տարեկան  սպորտային պայքարի մեջ եմ եղել, արդեն շուրջ 9 տարի է, ինչ քաղաքական պայքարի մեջ եմ: Հաճույքով եմ պայքարում։ Ասեմ Ձեզ, երբևիցե պրովոկացիաների չեմ ենթարկվում, ուրիշի հաշվին իմ վարկանիշը չեմ բարձրացնում:

—Բայց չկա՞ն մարդիկ, ում   անձնապես կամ նրա  գաղափարները տանել չեք կարողանում: Հավասարակշռությունը բոլորի հետ պահպանելն այդքան էլ հեշտ չէ:

-Գաղափար ասվածը, եթե Դուք վերցնեք բոլոր կուսակցությունների, թեկնածուների գաղափարները, ամեն ինչ շատ սիրուն գրված է: Ես գաղափարախոսական ծրագրերին տեղ չեմ տալիս: Չեմ պատկերացնում փոքր երկրում ինչո՞ւ են այդքան կուսակցություններ, այն դեպքում, երբ գաղափարաները գրեթե նույնն են: Ամեն ինչ անում եմ, որ կուսակցական լինելու ֆակտորն իմ վրա չազդի: Ես նախորդ ընտրություններին ծրագիր ունեցել եմ, իսկ հիմա ավելի գործնական եմ պատկերացնում հետագա աշխատանքս:

—Դուք նշեցիք, որ պրակտիկ գործելաոճի կողմնակից եք, ասացե՛ք, այդ դեպքում կոնկրետ ի՞նչ ուղղություններով եք տեսնում Ձեր աշխատանքը վերընտրվելու դեպքում, որոնք են Ձեր մարզի առաջնային և դեռևս չլուծված խնդիրները:

-Առաջնային խնդիրները գտնում եմ, որ սոցաիալական խնդիրներն են, հացի խնդիրը, առողջապահության և սպորտի ոլորտները: Մեր ժողովրդին պետք չէ օգնել 1 ամսով, աշխատատեղեր պետք է ստեղծենք, մտածում ենք: Շուտով Աշտարակ քաղաքում իմ համառության շնորհիվ և ՀՀ նախագահի աջակցությամբ մարզադպրոց է բացվելու, մոտ 40 աշխատատեղ է լինելու, բոլորը տեղաբնակներ են աշխատելու:

-Բայց եթե ոչ մի ձեռնարկություն, արտադրություն չի ստեղծվում, ինչպե՞ս եք պրակտիկայում պատկերացնում, որ նոր աշխատատեղեր կստեղծվեն:

-Ես ինչ  ասում եմ, դա էնպես չէ, որ մի տարի հետո լինելու է, դա տարիների և ժամանակատար գործ է:

-Այս տարիների ընթացքում ի՞նչ խնդիրներ են լուծվել Ձեր կողմից, որ հիմա ուզում եք շարունակել Ձեր պատգամավորական աշխատանքը:

-Ճանապարհաշինության հարց ենք կարգավորել, վիրահատություններ են կատարվել: Փարպի, Բազմաղբյուր և Ազատավան գյուղերում մեկ մանկապարտեզ է եղել , կոմունիստական կարգերի փլուզումից հետո այդ մանակապարտեզը դադարեց գործել: Ես խնդրեցի ՀՀ նախագահին, ներկայացրեցի խնդիրը, և մեկ ամսվա ընթացքում մոտ 200 մլն դրամ ներդրում արվեց, շինարարության մոտ 60 տոկոսն արված է, մոտ 4 ամսից մանակապարտեզը կհանձնվի շահագործման, մոտ 140 երեխա այդ 3 գյուղերից կհաճախեն այդ մանակապարտեզ: Բացի այդ, մարզում բոլորն իմ հեռախոսահամարն ունեն և ցանկացած հարցով զանգում են ինձ: Ի տարբերություն մնացած պատգամավորների` ինձ 5 տարվա մանդատը չփոխեց: Իմ գլխավոր այցեքարտն այն է, որ պատգամավոր լինելն ինձ չի կարող փոխել:

-Ինչպե՞ս կմեկնաբանեք այն լուրերը, որ Ձեր աջակիցները Դաշնակցության համակրի են ծեծի ենթարկել` հրավիրելով նրան Ձեր տուն:

-Ովքեր ինձ գիտեն, գիտեն, որ ես նման բան չեմ անի, էն էլ իմ օջախում: Իմ օջախ ասածը ես Ձեզ ասեմ, թե ինչ է՝ իմ օջախը իմ հայրական, պապական օջախն է: Այդ ժամանակից ի վեր ինչքան  որ նշանավոր մարդիկ գիտեք Հայաստանից և Հայաստանի սահմաններից դուրս, նրանց 90 տոկոսը հյուրընկալվել են մեր տանը: Իմ օջախում աղուհացից բացի ոչինչ չէր կարող լինել:

-Դուք չեք էլ կասկածո՞ւմ, թե ով կարող է լինել այդ մարդը, ով, ըստ շրջանառվող լուրերի, հիմա հիվանդանոցում է:

-Ոչ, ես չգիտեմ, թե ում մասին է խոսքը, դատախազությունը հիմա քննում է այդ գործը: Եթե այդ լուրերը սուտ չլինեին, ապա ինչպե՞ս կարող էր մարդը ծեծի հետքերով հայտնվել հիվանդանոցում, և իրավապահ մարմինները, մարզային ոստիկանությունը տեղյակ չլինեին, որ ծեծի ենթարկված մարդ է բերվել հիվանդանոց:

-Ի՞նչ կարգախոսով եք մասնակցում առաջիկա ընտրություններին:

-2012թ. ընտրություններին ես շատ մեծ դժվարությունների միջով անցա, ես այդ ժամանակ կոալիցիոն ուժ կազմող «Բարգավաճ Հայաստան» կուսակցությամբ էի առաջադրվել, պայքարում էի իշխող Հանրապետական կուսակցության դեմ և հասա նրան, որ մոտ 18 հազար ձայն հավաքեցի: Կարգախոսս էդտեղից է ստեղծվել, ժողովուրդն օգնեց ինձ, որպեսզի ծառայեմ իրենց ու ստեղծվեց իմ կարգախոսը` «Օգնեք ինձ՝ ծառայելու Ձեզ», որովհետև  վստահ եմ, որ իմ ուժերի մաքսիմում չափով եմ աշխատել:

Մարիաննա Եղիազարյան