«Պրոգրես» համալսարանում արձանագրվել է առանց ուսուցման պետական նմուշի ավարտական դիպլոմ ձեռք բերելու վերաբերյալ առևտրային կաշառքի մի քանի դեպք:

Այսպես, «Փաստինֆո»-ի տեղեկություններով՝ միջնորդը, տեղեկանալով, որ մի կին երրորդ անձի համար ցանկանում է առանց ուսուցման ձեռք բերել պետական նմուշի ավարտական դիպլոմ, համաձայնել է օգնել և դիմել է հիշյալ համալսարանի ռեկտորին: Նա էլ դուրս է գրել նշված համալսարանի ավարտական դիպլոմ և պահանջել 800 ԱՄՆ դոլար առևտրային կաշառք՝ այդ գումարից 100 ԱՄՆ դոլարը միջնորդին թողնելու պայմանով:

Միջնորդը, ստանալով պահանջված գումարը, իրեն հասանելիք 100 ԱՄՆ դոլարը վերցրել է, իսկ մնացած 700 ԱՄՆ դոլարը տվել է համալսարանի ռեկտորին: Արդյունքում՝ բազմաքայլ օպերացիան հանգուցալուծում է ստացել. ստացած առևտրային կաշառքի դիմաց ռեկտորը պատրաստել է պաշտոնական փաստաթուղթ հանդիսացող «Պրոգրես» համալսարանի բժշկական քոլեջն ավարտելու մասին դիպլոմը և իրացրել միջնորդին, նա էլ՝ իրեն դիմած կնոջը, վերջինս էլ՝ երրորդ անձին:

Հաջորդ «գործարքն» արդեն դուրս է եկել Հայաստանի սահմաններից. միջնորդը, իմանալով, որ ԱՄՆ քաղաքացին (2017թ. փետրվարի 24-ից հետախուզվում է ՀՀ քրեական օրենսգրքի 200-րդ հոդվածի 1-ին մասի՝ առևտրային կաշառք, մեղադրանքով) ցանկություն ունի առանց ուսուցման երրորդ անձանց տվյալներով ձեռք բերել պետական նմուշի ավարտական դիպլոմներ, կրկին համաձայնել է օգնել նրան և դիմել է ռեկտորին, նա համաձայնել և պահանջել է շուրջ 5.000 ԱՄՆ դոլար և դուրս գրել համալսարանի և քոլեջի՝ թվով վեց հատ դիպլոմ՝ այն հանձնելով միջնորդին, նա էլ փոխանցել է պատվիրատու կնոջը:

ՀՀ քրեական օրենսգրքի 200-րդ հոդվածի 1-ին մասի հատկանիշներով հարուցված քրեական գործով նախաքննությունը շարունակվում է։

Աղբյուր`pastinfo.am