Ընտրություններին դեռ մեկ ամիս կա , սակայն ուրվագծվում է մարտ՝ առանց կանոնների ձևաչափը։

Նախընտրական շրջանը դեռ չսկսած, արդեն չորրորդ միջադեպն է գրանցվել, որը եզրեր չունի պայքարի քաղաքակիրթ մոտեցումից, ու ,ցավոք, ակնհայտ է, որ սրանք դեռ կոկոններն են, ծաղիկները հետո են բացվելու:

Արարատի մարզում ՀՀԿ-ական թեկնածու Մուրադ Մուրադյանի կողմնակիցների մասնակցությամբ օրերս կրկին միջադեպ է տեղի ունեցել: Դեպքը տեղի է ունեցել Սայաթ-Նովա գյուղում։ Արթուր Հայրապետյանը, որը Մուրադյանի կողմնակիցներից է, «Ծառուկյան» դաշինքի աջակից Աբրահամ Ադամյանի հետ վիճաբանել է, որը շարունակություն է ունեցել։ Համագյուղացիները կրկին հանդիպել են ու վեճն ավարտվել է դանակի բազմաթիվ հարվածներով: Բարեբախտաբար Ադամյանի կյանքը հասցրել են փրկել՝ հասցնելով Երևան:

Ցավոք, սա կարող է զարգացում ունենալ։ Նույն գյուղում ապրող ընտանիքներ, բարեկամ, ընկերներ…

Շրջանառվող լուրերից պարզ է դառնում, որ իրավիճակը լարված է հատկապես մարզերում։ Օրեր առաջ Արագածոտնի մարզի ՀՀԿ–ից ռեյտինգայինով առաջադրված Բազմասեր Առաքելյանի և ՀՅԴ համակիր–համագյուղացու հետ ունեցած վեճը դեռ հարթված չի կարելի համարել: Չնայած կողմերը հաշտվել են, սակայն դաշնակները համարում են, որ Արագածոտնում վիճակը շարունակում է մնալ լարված:

Արարատում վիճակը նույնպես թեժանում է. ծեծկռտուք է եղել «Գազի Հովոյի» որդու և Արգամ Աբրահամյանի ընկերոջ միջև։

Նշենք, որ Գազի Հովոն եւ իր թիմակիցներն աշխատում են «Ավշարի» սեփականատեր Արայիկ Գրիգորյանի համար։ Իսկ Արգամ Աբրահամյանը մասնակցում է «Ծառուկյան դաշինքով»։

Չկա այն ուժը, որն այս օրերին հակազդի տարվող պայքարի խայտառակ ձևաչափին: Վաղն իրար աչքերի մեջ նայելու են այսօր հրապարակ նետված մարդիկ, որոնք մի քանի կոպեկի համար օգտագործվելու են ու դեն շպրտվեն: Ներկայացումն ավարտելուց հետո «տիկնիկները» լցվելու են տուփերը, իսկ «տիկնիկավարները» մեծ հաշվով թքած ունեն  նրանց ստացած վնասվածքների վրա:

Ռուզան Ավոյան