Օրեր առաջ տեղեկացրել էինք, որ «Սասնա ծռեր» խմբին սննդամթերք հասցրած Արթուր Սարգսյանի ներկայացուցիչները դիմել էին ՄԻԵԴ, մասնավորապես, ՀՀ կառավարությունից պահանջելով ապահովել դիմողի բուժումը, անհրաժեշտության դեպքում քաղաքացիական հիվանդանոցում, և գործուն միջոցներ ձեռնարկել Արթուր Սարգսյանի նկատմամբ Կոնվենցիայի 3-րդ հոդվածով արգելված անմարդկային վերաբերմունքից նրան զերծ պահելու համար։

Նշենք, որ այսօր փաստաբանները հայտարարություն են տարածել, համաձայն որի՝ ՄԻԵԴ-ն արձագանքել է իրենց դիմումին:

ՄԻԵԴ-ը «Հաց բերող» Արթուր Սարգսյանի գործով ՀՀ կառավարությանը հարցեր է ուղղել և պահանջել պատասխանել դրանց: Մասնավորապես՝ ի՞նչ առողջական վիճակում է գտնվում Արթուր Սարգսյանը, պահանջել է ՄԻԵԴ տրամադրել նրա առողջության վերաբերյալ բժշկական բոլոր և այլ փաստաթղթերը, ներառյալ նրան ցուցաբերված բուժօգնության ողջ նկարագրությունը, տրամադրված դեղորայքի ցանկը, հիվանդության պատմությունը: Բացի այդ, ՄԻԵԴ-ը հարցրել է՝ արդյո՞ք Արթուր Սարգսյանին նշանակված է եղել դեղորայք և հատուկ սնունդ, և, եթե այո, ապա արդյոք այն ապահովվել է նրան կալանավայրի վարչակազմի կողմից: Հավելենք նաև, որ ավելի վաղ պաշտպաններն ահազանգել էին, որ Արթուր Սարգսյանը առողջական լուրջ խնդիրներ ունի: Իրավապաշտպան Ժաննա Ալեքսանյանը բարձր է գնահատում ՄԻԵԴ-ի ընթացակարգը:

«Սա խոշտանգում է, փաստորեն, Արթուր Սարգսյանի նկատմամբ՝ հաշվի առնելով նրա առողջական վիճակը: Այն հիվանդությունը, որ նա ունի, ամրագրված է նաև օրենքում և միջազգային փաստաթղթերում: Այդ հիվանդությամբ նա ունի բանտային պայմանների անհամատեղելի՝ օրենքով նախատեսված իրավունք: Բայց այս երկրի, Արդարատաության նախարարի վրա ոչինչ չի ազդում: Խոշտանգում են, սպանում են, մարդը մեռնում է, բայց նախարարին դա ընդհանրապես չի հետաքրքրում: Սա անմարդկային վերաբերմունք է երկրի կողմից իր քաղաքացու նկատմամբ»,- NewsBook-ի հետ զրույցում ասաց իրավապաշտպանը:

Խոսելով ՄԻԵԴ-ի կողմից արագ արձագանքման մասին՝ մեր զրուցակիցը նշեց, որ ցավոք սրտի, այս իշխանություններն ընդհանրապես դասեր չեն առնում: «Վերջերս մենք ՄԻԵԴ-ի կողմից ունեցանք որոշումներ, բայց իրենք շարունակում են մարդկանց պահել անմարդկային պայմաններում և անմարդկային վերաբերմունք ցուցաբերել: Կառավարությունը չի կարող չպատասխանել ՄԻԵԴ-ի հարցերին: Այս դեպքում միանշանակ է նաև, որ եթե ՄԻԵԴ-ը կառավարությունից պարզաբանումներ է ուզում, նշանակում է, որ գործն ընթացք է ստանալու և հետևանքներ է ունենալու: Ես վտսահ եմ դրանում և կասկած անգամ չունեմ: Դա Հայաստանը չէ, ՄԻԵԴ-ն է, և այդ կառույցը հնարավոր չէ անլուրջ վերաբերվի այդ ընթացակարգերին կամ ընդհանրապես՝ մարդուն: Եթե չլինեին միջազգային ատյանները, Հայաստանում մարդիկ չգիտեմ՝ ինչ վիճակում կհայտնվեին»,- ասաց նա՝ հավելելով, որ ՔԿՀ-ներում վիճակն անտանելի է:

«ՄԻԵԴ-ը, բացի փաստաբաններից, ցանկանում է լսել նաև կառավարության կարծիքը: Ընթացակարգն է այդպիսին: Կառավարությունն արդյո՞ք կկարողանա հակափաստարկներ ներկայացնել փաստաբանների ներկայացրած վատ վիճակին: Պետք է կառավարությունը կարողանա ապացուցել՝ այդպես է, թե՝ ոչ: Սա է ընթացակարգի իմաստը: ՄԻԵԴ-ը միայն վերջում է եզրակացնում և ըստ ուղարկված փաստերի է որոշում կայացնում»,- ասաց իրավապաշտպանը: Նա ընդգծեց, որ ամեն ինչ փաստերի վրա է հիմնված: «Նրանք մանրամասն ուսումնասիրում են, թե ով՝ ինչ փաստ է ներկայացրել: Ես վստահ եմ, որ փաստաբանները հենց այնպես չեն ներկայացրել այդ փաստերը: Մենք գիտենք, որ Արթուր Սարգսյանի վիճակը շատ վատ է, վերջերս նրա համար շտապօգնություն էին կանչել, ուշացումով էր արձագանքել ՔԿՀ-ն, ՄԻՊ-ն է այցելել նրան, այսինքն՝ մարդը խնդիր ունի: Չեմ կարծում, որ կառավարությունը կկարողանա այնպիսի ապացույցներ ներկայացնել, որ հակառակը լինի: Ես վստահ եմ, որ կառավարությունը տանուլ է տալու: Երկար ժամանակ է՝ նրա վիճակը վատ է, և նրան նույնիսկ քաղաքացիական հիվանդանոց չեն ուղարկում: Կամ ինչո՞ւ է կալանքի տակ պահվում, եթե օրենքով նախատեսված է, որ չպետք է պահեն, քանի որ նա բանտային պայմանների հետ անհամատեղելի հիվանդություն ունի»,- եզրափակեց մեր զրուցակիցը:

Նյութի աղբյուրը ` Newsbook.am