Մինչ Երեւանի ձյան մաքրման աշխատանքներն իրականացնող «Սանիթեք» ընկերության ֆեյսբուքյան էջում քննադատություններ են հնչում քաղաքի տարբեր հատվածներն անտեսելու կապակցությամբ, ընկերությունը Երեւանի բնակիչներին կոչ է անում համբերությամբ զինվել.

«Մեր թիմը շարունակում է ձնամաքրման աշխատանքները արտակարգ ռեժիմով։ Այսօր արդեն 72-րդ ժամն է՝ անընդմեջ աշխատանքի 3-րդ օրը։ Եղանակը -12 աստիճան է հիմա, փողոցները սառած, մենք սառած… Բայց տրամադրված ենք մարտական ։) Համբերությամբ զինվե՛ք, մեր սիրելի երևանցիներ, շարժվում ենք հիմա դեպի ձեր փողոց»,- ասվում է ֆեյսբուքյան էջում քիչ առաջ տեղադրված հաղորդագրությունում:

«Սանիթեք» ընկերությունից հայտնում են նաեւ, որ եղանակային կանխատեսումներն առաջիկա օրերի համար մտահոգիչ են.

«Անընդմեջ տեղումները հնարավոր է շարունակվեն ևս մի քանի օր, ինչպես նաև սպասվում է ջերմաստիճանի կտրուկ իջեցում, ընդհուպ մինչև -16 աստիճան, իսկ բարձրադիր վայրերում հնարավոր է քամի ու ձնաբուք: Քանի որ նման եղանակային պայմաններում մերկասառույցի գոյացումն ու ձնամաքրման աշխատանքների կատարման ընթացքում բարդությունների առաջացումն անխուսափելի է, ակնկալում ենք Երևանի բնակիչների համագործակցային վերաբերմունքը ձնամաքրման աշխատանքների մասով»,- ասվում է հաղորդագրությունում:

Ընկերությունից նշում են, որ իրենց 640 աշխատակիցները ամենայն պատասխանատվությամբ և հոգատարությամբ շարունակում են աշխատանքները օր ու գիշեր, ուստի բնակիչների բարեկամական վերաբերմունքը ոգևորիչ կլինի հենց այժմ էլ Երևանի փողոցները ձյունից մաքրող աշխատակիցների համար:

Հիշեցնենք, ըստ «Հիդրոմետ» ծառայության կանխատեսումենրի՝ օդի ջերմաստիճանը 17-19-ն աստիճանաբար նվազելու է 10-12 աստիճանով: