ՀՀ էներգետիկայի և բնական պաշարների նախարարի տեղակալ Հայկ Հարությունյանը լրագրողների հետ հանդիպմանի ասաց, որ ցանկություն կա ստեղծել արտադրություն սպառման կետում, որի լավագույն միջոցը արևային էներգետիկան է: Հարությունյանի համոզմամբ՝ արևային պանելներով կարելի է մատչելի էներգիա ստանալ.

«Այս ծրագիրն իրականացնելու համար պետք են համակողմանի միջոցառումներ, որպեսզի բոլորը հասկանան, թե ի՞նչ օգուտներ կան այս ծրագրից, ու բոլորը հասկանան, որ արդեն իմաստ չունի արևային պանելներ չդնելը: Կարծում եմ՝ շատ կարճ ժամանակում կկարողանանք հասնել դրան, որովհետև գիտենք՝ կոնկրետ ինչ պետք  է անենք, ու հիմա ամենօրյա աշխատանք է տարվում բոլոր շահագրգիռ կողմերի հետ, որպեսզի այս ծրագիրը մշակվի և իրականացվի»:

Հարությունյանն ընդգծել է, որ յուրաքանչյուր քաղաքացի արդեն կարող է դիմել ՀԾԿՀ ու կառուցել արևային կայան, իսկ պետությունն արդեն էներգետիկայի մասին օրենքով 20 տարի պարտավոր կլինի այդ էներգիան գնել:

Նա նաև նշեց, որ հաջորդ տարի նախատեսվում է մրցույթ անցկացնել` 50 մեգավատտ հզորությամբ արևային կայան կառուցելու համար.

«Սա կլինի բավականին խոշոր ծրագիր, ու մրցույթը կլինի սակագնի համար: Մենք ակնկալում ենք բավականին ցածր սակագին: Շատերը պնդում են, որ արևային էներգետիկան թանկ է, պետք չէ դա օգտագործել, բայց մենք այս ծրագրով փորձում ենք ապացուցել, որ դա այդպես չէ, արևային էներգետիկան մատչելի էներգիայի աղբյուր է, և ակնկալվող սակագինը լինելու է բավականին ցածր»։

էներգետիկայի և բնական պաշարների փոխնախարարի տեղեկացմամբ՝ ցանկություն կա մինչև 2020 թվականը առաջնային էներգիայի սպառումը կրճատել 38 տոկոսով՝ նաև վերը նշված աշխատանքների շնորհիվ:

Հայկ Հարությունյանը նշեց, որ Հայաստանը նպատակ ունի ավելացնել արտահանվող էլեկտրաէներգիայի ծավալները:

«Հայաստանից արտահանվող ապրանքների ցանկում էլեկտրաէներգիան 6-րդ տեղում է: Ցանկանում ենք այդ հորիզոնականը բարձրացնել: Զգալի աշխատանքներ են իրականացվում տարածաշրջանային ինտեգրացման նպատակով: Ներկայում կառուցում ենք երկու էլեկտրահաղորդման գիծ, մեկը՝ դեպի Իրան, մյուսը՝ դեպի Վրաստանի: Նպատակ ունենք ﬕնչև 2019 թվականը երկու ուղղություններով էլ աշխատանքն ավարտել: Դրա արդյունքում մեր փոխհոսքերի, տրանզիտի կարողությունները 10 անգամ կավելանան: Հայաստանը կդառնա լուրջ տարանցիկ երկիր»: