Կառավարության կողմից հավանության արժանացած նախագծով նախատեսվում է՝ ընտանեկան կարգավիճակի տեղեկանք ստանալու համար ներկայում գործող համակարգը փոխարինել մեկ պատուհանի սկզբունքով գործող համակարգով՝ բացառելով տեղեկանք ստանալու համար տարբեր ՔԿԱԳ մարմիններ այցելելու պահանջը: Մասնավորապես, այլ պետություն ներկայացնելու համար քաղաքացին ստիպված չի լինի այցելել իր բնակության վայրերի ՔԿԱԳ մարմիններ և Արդարադատության նախարարություն նշված տեղեկանքը ստանալու համար, այլ անմիջապես տեղեկանքը կստանա Արդարադատության նախարարությունից կամ կառավարության կողմից լիազորված օպերատորից /օրինակ՝Հայփոստի մոտակա մասնաճյուղից/:

Մեկ պատուհանի սկզբունքով տեղում կապահովվի տեղեկանքի թարգմանությունը և ապոստիլով վավերացումը, քանի որ տեղեկանքը հիմնականում տրվում է այլ պետություններում գործածելու համար։

Ավելին՝ այն կտրամադրվի ոչ միայն Արդարադատության նախարարության կողմից, այլև կառավարության որոշմամբ սահմանված պետական ծառայություններ մատուցող միասնական օպերատորների և հյուպատոսական հիմնարկների միջոցով, ինչպես նաև էլեկտրոնային եղանակով.

Իսկ  հյուպատոսական հիմնարկների միջոցով տեղեկանք ստանալու գործընթացը մի քանի ամսից կրճատել մինչև մի քանի օր:

Կառավարությունը որոշեց տեղեկանք տրամադրել նաև բնակչության պետական ռեգիստրում հաշվառված՝ ՀՀ մշտական բնակության վայր չունեցող (չունեցած) ՀՀ քաղաքացիների վերաբերյալ ինչը գործող կարգավորման համաձայն չի արվել։

Նախագիծը կառավարությունում ներկայացրեց արդարադատության նախարար Արփինե Հովհաննիսյանը՝ նշելով, որ նախագծի ընդունմամբ կկրճատվեն նաև օտարերկրյա պետություններում գտնվող անձանց՝ ամուսնության բացակայության վերաբերյալ տեղեկանքի տրամադրման ժամկետները: Միաժամանակ, ՀՀ արդարադատության նախարարության և ՀՀ հյուպատոսական հիմնարկների միջև ուղղակի կապի ստեղծման շնորհիվ հնարավորություն կընձեռվի ապահովել սույն գերատեսչությունների միջև ընթացակարգերի հստակեցումը և պարզեցումը, ինչպես նաև սպասարկման որակի բարելավումը՝ ի հաշիվ քննարկման առարկա հանդիսացող բնագավառում ընթացակարգերի ժամկետների կրճատման: