«Հենց ձյուն է գալիս` վախենում ենք, գիտենք, որ ամբողջ օրն անլույս ենք անցկացնելու». բողոքում են սարիթաղցիները

Աշնան գալուն պես, երբ հաճախակիանում են տեղումները և եղանակն սկսում է օրը մի անակնկալ մատուցել (անձրև, քամի, ձյուն), Սարի թաղում անմիջապես վնասվում են էլեկտրասյուները, ինչի պատճառով տեղաբնակները ժամեր շարունակ զրկվում են լույսից և ջեռուցումից: Այդպես եղավ նաև օրեր առաջ, երբ ողջ հանրապետությունով մեկ տեղաց առաջին ձյունը: Օրերս, «Հայկական վարկած»-ին ահազանգած Սարի թաղի մի խումբ բնակիչներ բողոքում էին, որ նոյեմբերի 2-ին, առավոտյան ժամը 10:00-ից մինչև ուշ երեկո` 22:00-ը, Սարի թաղում լույս չի եղել: Նրանց խոսքով` Սարի թաղում նման բարձիթողի վիճակը խոսում է թաղեցիների նկատմամբ պատկան մարմինների ունեցած անփույթ վերաբերմունքի և անտարբերության մասին. «Մեր բողոքները, զանգերը միշտ անարձագանք են մնում: Շատ ժամանակ, երբ որ զանգում ենք` չեն էլ լսում, արհամարհում են, կամ էլ` արդարանալու համար, մի ստից պատճռաբանությամբ անջատում են հեռախոսը»,- պատմում էին Սարի թաղի 18 փողոցի բնակիչները:

«Հենց ձյուն է գալիս` արդեն վախենում ենք, գիտենք, որ ամբողջ օրն անլույս ենք անցկացնելու: Միշտ նույն պատասխանն են տալիս` սարքում ենք, վերանորոգում ենք…, ի՞նչն են վերանորոգում, որ հարցն այդպես էլ չի լուծվում…: Հոսանքի վարձը մի օր ուշացնենք` կգան կանջատեն, բա մենք ո՞նց ենք էս վիճակով ապրում` տանը փոքր երեխաներ, հիվանդներ: Ամբողջ ամառ ոչինչ չարեցին, սպասեցին ձմեռը գա, որ սենց խաղ խաղան գլխներիս..»,- մեկը մյուսին լրացնելով գանգատվում էին տեղաբնակները:

Սարի թաղն սպասարկող դիսպետչերական ծառայության աշխատակիցը մեզ հետ զրույցում տեղեկացրեց, որ հաճախ են նման վթարներ լինում, որոնք, մեծամասամբ, պայմանավորված են անբարենպաստ եղանակներով. «Սո´ւտ է , թե 12 ժամ լույս չեն ունեցել, 8 ժամ է ընդամենը անջատած եղել հոսանքը…: Ձյունը դնում է` լարը կտրվում է, ի՞նչ կարող ես անել»,- արդարացավ մեր զրուցակիցը:

Մեր հարցին` ինչո՞ւ ժամանակին չեն վերանորոգվում վնասված էլեկտրալարերը, որպեսզի նման խնդիրներ չառաջանան, ասաց, որ դա իրեն չվերաբերող հարց է` հավելելով, որ այդպիսի արտակարգ իրավիճակներում աշխատում է շրջիկ բրիգադը, որը գնում է ահազանգերի հետքերով և վերականգնում պոկված, կտրված լարերը. «ՀԷՑ-ը կայանների վերափոխման աշխատանքներ է կատարում, նա ավելի ստույգ կպատասխանի ձեր հարցին»,- եզրափակեց մեր զրուցակիցը` խորհուրդ տալով նրանց դիմել:

«Հայաստանի էկետրական ցանցեր» ընկերության հասարակայնության հետ կապերի դեպարտամենտի պետ Նատալյա Սարջանյանը` ծանոթանալով խնդրին, ասաց, որ Սարի թաղի էլեկտրացանցը բավականին մաշված է: «Մենք, ոչ միայն Սարի թաղում, այլև ամբողջ հանրապետությունում ունենք տարածքներ, որտեղ առկա են նմանատիպ խնդիրներ: Ներդրումային ծրագրերի շրջանակներում փորձում ենք լուծում տալ: Միանգամից, բնականաբար, դա չի լինի: Կոնկրետ Սարի թաղի մասով կարող եմ ասել, որ 2017 թվականի առաջին կիսամյակում, նեդրումային ծրագրով, նախատեսված է այդ հատվածի ցանցը փոխարինել մալուխային ցանցով, նորացնել հենասյուները և օդային գծերը, որի արդյունքոմ Սարի թաղի էլեկտրամատակարարման հետ կապված բոլոր խնդիրները կլուծվեն»,- հավաստիացրեց Նատալյա Սարջանյանը:

Անի Գրիգորյան