Հոկտեմբերի 27-ի ուշ երեկոյան կաշառք պահանջելու և ստանալու կասկածանքով ձերբակալված Երևանի Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանը ցուցմունք չի տվել:

Այդ մասին «Փաստինֆո»-ի թղթակցի հետ զրույցում ասաց Իշխան Բարսեղյանի պաշտպան Վարդուհի Էլբակյանը` հավելելով, որ այսօր նախատեսվում է դատավորի մասնակցությամբ քննչական գործողություն:

Պաշտպանը նաև նշեց, որ դատավորը, ով առողջական խնդիրներ ունի՝ սրտի, ճնշման և աղիների հետ, մշտապես գտնվել է բժիշկների հսկողության ներքո, նախօրեին նրա վիճակը կտրուկ վատացել է, սակայն հրաժարվել է բժշկական օգնությունից:

Տեղեկացանք նաև, որ դատավորի առողջական խնդիրներն Արցախյան պատերազմի տարիներին վիրավորվելու հետևանք են:

Ինչ վերաբերում է երեկ ԱԱԾ-ի կողմից հրապարակված տեսանյութին, որում երևում է, թե ինչպես է դատավոր Իշխան Բարսեղյանը կաշառք վերցնում, պաշտպանը անմեղության կանխավարկածի կոպիտ խախտում համարեց`հավելելով, որ «մարդուն խայտառակ են անում, եթե նա արդարացվի, ի՞նչ պետք է անենք այդ դեպքում»:

Ավելի վաղ տեղեկացրել ենք, որ հոկտեմբերի 27-ին ձերբակալվել է դատավոր Իշխան Բարսեղյանը` Ազգային անվտանգության ծառայության կողմից` կաշառքի կասկածանքով:

ԱԱԾ հաղորդագրության համաձայն` քաղաքացիական գործով կողմի օգտին որոշում կայացնելու համար դատավորը պահանջել և Երևանի հետիոտնային գետնանցումներից մեկում անձամբ ստացել է 1000 ԱՄՆ դոլար գումար, որի փոխանցումն իրականացվել է Ազգային անվտանգության ծառայության աշխատակիցների օպերատիվ վերահսկողության ներքո:

Նյութերն ուղարկվել են ՀՀ հատուկ քննչական ծառայություն, որտեղ քրեական գործ է հարուցվել ՀՀ քրեական օրենսգրքի 311-րդ հոդվածի 4-րդ մասի 3-րդ կետով: ՀՀ գլխավոր դատախազը միջնորդություն է ներկայացրել ՀՀ արդարադատության խորհրդին Երևան քաղաքի Շենգավիթ վարչական շրջանի ընդհանուր իրավասության դատարանի դատավորին որպես մեղադրյալ ներգրավելու և կալանավորելու համաձայնություն տալու առաջարկով ՀՀ Նախագահին դիմելու համար: Արդարադատության խորհուրդը բավարարել է գլխավոր դատախազի միջնորդությունը: