«Սոցիոմետր» սոցիոլոգիական կենտրոնի տնօրեն Ահարոն Ադիբեկյանի խոսքով՝ Հայաստանում առաջնային է աշխատատեղերի ստեղծման խնդիրը:

«Իմ հաշվարկներով՝ մոտակա հինգ տարիների ընթացքում պետք է ստեղծել 100-150 000 աշխատատեղ, որի համար կպահանջվի մոտավորապես 150 մլրդ դոլար: Այդ դոլարները աշխատում են, պտտվում են, սակայն Հայաստան չեն կարողանում հասնել: Գտնում եմ, որ եթե Հայաստանը լինի ավելի ազատ մրցունակ երկիր և ներդրումների ազատությունը լինի ավելի բարենպաստ, ապա այդ գումարները կգան: Կառավարության ծրագրում հինգ կետով ուզում են մրցունակությունը  և բիզնեսի իրականացման խթանումը հինգ աստիճանով բարձրացնել»,— լրագրողների հետ հանդիպման ժամանակ ասաց Ահարոն Ադիբեկյանը:

Բանախոսը հայտնեց, որ բիզնեսի ազատության առումով Հայաստանն աշխարհում 35-րդ տեղում է, սակայն գումար չի գալիս: Հետևաբար, խնդիրներն այլ ոլորտներում են:

Անդրադառնալով նվազագույն աշխատավարձի բարձրացմանը, Ադիբեկյանն ասաց. «Նվազագույն աշխատավարձը 2017 թվականին ցանկանում են դարձնել 65 000 դրամ: Ինչ է նշանակում 65 000 դրամ նվազագույն աշխատավարձ: Հաշվարկեք կոմունալ ծախսերը, սնունդը, հիգիենիկ ծախսերը: Թոշակների մասին ընդհանրապես խոսք չկա: Ես չեմ մեղադրում կառավարությանը, սակայն խոսքն այն մասին է, որ նրանք դա պետք է 20 տարի առաջ մտածեին և անեին, նոր-նոր եկել են այն մտքին, որ պետությունը պետք է լինի տնտեսական մեծ խաղացող»: 

Ադիբեկյանի խոսքով պետությունը պետք է գործնական օգնություն ցույց տա ձեռներեցության զարգացմանը:
«Հույս ունենանք, որ այդ ստեղծվելիք ներդրումային հիմնադրամը կլինի բավականին խոշոր և Հայաստան գումարներ կբերի»,-եզրափակեց Ադիբեկյանը: