Ռուսաստանի Դաշնության «Լիբերալ-դեմոկրատական» կուսակցության ղեկավար Վլադիմիր Ժիրինովսկին «Լիդեր TV» հեռուստաալիքին տված հարցազրույցում հանդես է եկել հակահայկական հայտարարությամբ: Նա անդրադարձել է ռուս-թուրքական հարաբերություններին և հայկական հարցին: Ժիրինովսկին հայտարարել է, որ «Եթե Թուրքիան ու Ռուսաստանը միավորեն իրենց առևտրական, տնտեսական և ռազմական ջանքերը, ապա և′ քրդական, և′ հայկական հարցերն իրենք իրենց կվերանան: Եվ ինքն իրեն կվերանա Ղարաբաղյան հարցը, և Ադրբեջանը գոհ կլինի, այսինքն` ամբողջ Կովկասի և Մերձավոր Արևելքի հեռանկարները հիանալի կլինեն»,- նշել է Վլադիմիր Ժիրինովսկին:

Վլադիմիր Վոլֆովիչի այս հայտարարությանը, թերևս կարելի էր նաև անլուրջ վերաբերվել, ինչպես անում են շատ քաղաքական գործիչներ, սակայն, ինչպես նկատում է քաղաքագետ Գագիկ Համբարյանը` շատ դեպքերում Ժիրինովսկին հայտարարում է այն, ինչը կցանկանար հայտնել ՌԴ նախագահ Պուտինը, բայց չի կարող այդ մակարդակով ու նման ձևով հայտարարել:
Քաղաքագետի խոսքով, այն ինչ հայտարարել է Ժիրինովսկին, նորություն չէ, քանի որ մի անգամ արդեն «ըմբոշխնել ենք» ռուս-թուրքական սերտ բարեկամության հետևանքները` 20-րդ դարի սկզբին: Ժիրինովսկին հիմա կրկնում է այն, ինչ կարող է տեղի ունենալ հայ ժողովրդի հետ արդեն 21-րդ դարի սկզբին:

«Ռուս-թուրքական բարեկամության արդյունքում Ռուսասատանը զիջումների է գնում, բայց ոչ թե իր տարածքների, այլ Հայաստանի հաշվին. հայտարարության մեջ ասվում է, որ «Ադրբեջանը գոհ կլինի ԼՂ հարցի կարգավորումից». Այստեղ Ժիրինովսկին բացեիբաց առուծախի առարկա է դարձնում Արցախյան հարցը… կարծում եմ ՀՀ Արտգործնախարարությունը պետք է շատ կոպիտ արձագանքի Ռուսաստանի Պետդումայի փոխխոսնակի այս վայրահաչությանը»,-ընդգծում է քաղաքագետը:

Նա հիշեցնում է. Վլադիմիր Վոլֆովիչը անցյալ տարի նոյեմբերի 24-ին, հիստերիկ ելույթներով, հայերին և քրդերին ուղղակիորեն դրդում էր ոտքի ելնել Թուրքիայի դեմ, հիմա արդեն «Լիդեր TV»-ին հարցազրույց տալով հայտարարում է, որ ռուս-թուրքական բարեկամությունը կարող է լուծել արցախյան հարցն այնպես, որ Ադրբեջանը գոհ մնա:

Քաղաքագետը ևս մեկ անգամ նկատում է, որ Ժիրինովսկին հասարակ մարդ չէ, նա Ռուսասատանի խոշորագույն կուսակցություններից մեկի ղեկավարն է, ով վերջին 5 գումարման պետդումաներում միշտ իր ներկայացուցչությունն է  ունեցել  ու բացի այդ էլ, նա պետական բարձրաստիճան պաշտոնյա է` ՌԴ պեդդումայի փոխխոսնակն է:

Գագիկ Համբարյանի խոսքով, ժամանակին ադրբեջանական կողմը Ժիրինովսկուն դատի էր տալիս: Նա չի բացառում, որ դատական գործընթացից հետո նրան հավանաբար կաշառել են ու հիմա Ժիրինովսկին դարձել է Ադրբեջանի բարեկամը:

«Վերջին շրջանում Ժիրինովսկու կուսակիցներն ուղղակիորեն հակահայկական գործունեությամբ են զբաղվում, և դա ևս մեկ անգամ ցույց է տալիս, որ ամբողջ Լիբերալ դեմոկրատական կուսակցությունը ծախված է ադրբեջանաթուրքական տանդեմին»,-ասում է Գագիկ Համբարյանը և հիշեցնում վերջերս տեղի ունեցած ևս մեկ ադրբեջանամետ իրադարձություն:
Նա մատնանշում է ՌԴ ԱԳՆ պաշտոնական ներկայացուցիչ Մարիա Զախարովայի հայտարարությունը` կապված Գարեգին Նժդեհի արձանի տեղադրման հետ: Քաղաքագետի պնդմամբ` հայտարարությունը Ժիրինովսկու կուսակիցներից մեկի սադրանքի հետևանք էր:
«Մեր արտգործնախարարությունը պետք է կոպիտ պատասխանի ու պահանջի Ժիրինովսկուց բացատրություններ տալ, ամենավատագույն դեպքում Հայաստանը պետք է նրան հայտարարի persona non grata, որպեսզի դրա ոտքը Հայաստանում չլինի»,-եզրափակեց քաղաքագետը: