Հայտնի է , որ 2016 թ. հունիսի 22–ին Երևան է ժամանելու Պոլսո պատրիարքի փոխանորդ Արամ Աթեշյանը: Վերջինս, մեր ունեցած տեղեկություններով, այժմ գտնվում է Մոսկվայում, որտեղ հյուրընկալվել է Ռուսատանի թեմի առաջնորդ Եզրաս արք. Ներսիսյանին:

Աթեշյանը բավականին մոտ բարեկամական հարաբերություններ ունի Եզրաս սրբազանի հետ: Մեզ հասած լուրերի համաձայն, նրանք անգամ ընդհանուր բիզնեսներ ունեն: Աթեշյանը Մոսկվա է մեկնել` մտադրություն ունենալով Հռոմի Պապի այցի հետ կապված այնտեղից Եզրաս Ներսիսյանի հետ ժամանել Երևան, սակայն Գարեգին Բ կաթողիկոսը զգուշացրել է եղբորը, որ հնարավոր է, Աթեշյանը խնդիրներ ունենա հայ հանրության հետ՝ տխրահռչակ նամակի անչությամբ:

Հիշեցնենք, որ Բունդեսաթգի որոշման վերաբերյալ Աթեշյանը նամակ էր գրել Էրդողանին, որն էլ զայրացրել է հայ հանրությանը։ Ֆեյսբուք սոց. ցանցում ստեղծվել է նախաձեռնող խումբ, որը տարածել է հայտարարություն.

«Մեծ Եղեռնի 100–րդ տարելիցին Հայաստանյայց Առաքելական Եկեղեցու կողմից սրբադասված մեր 1,5 միլիոն անմեղ զոհերի հիշատակը օրեր առաջ հրապարակավ պղծած Կ. Պոլսի հայոց պատրիարքի աթոռը բռնազավթած Արամ Աթեշյանը Հռոմի պապի Հայաստան այցելության առիթն օգտագործելով ցանկանում է իր անցանկալի ներկայությամբ մեր երկիրն էլ պղծել։ Երբ Բունդեսթագի թուրք պատգամավորները հորդորում են արգիլել Էրդողանի մուտքը Գերմանիա, մենք ևս սուրբերի շարքին դասված իր միլիոնավոր զոհերի հիշատակը հարգող հայ ազգի արժանապատիվ զավակներ թույլ չենք տալու նրա Հայաստան մուտքը։ 2016 թ. հունիսի 22–ին հանդիպում ենք Զվարթնոց օդանավակայանում, Ռ. Թ. Էրդողանի դրածո Աթեշյան կոչեցյալ Աթեշօղլուին մեր երկիր մուտքը թույլ չտալու համար»։

Աննա Գևորգյան