Բաքվի Սաբունչիի շրջանում հայտնաբերված վարորդական վկայականըպատկանում է ապրիլյան պատերազմում զոհված 34-ամյա գյումրեցի փոխգնդապետ Ալեքսան Առաքելյանին: Այդ մասին մեզ հետ զրույցում հայտնեց Առաքելյանի հայրը՝ Գեւորգը:

Նշենք, որ ադրբեջանական լրատվամիջոցներից մեկն այսօր տեղեկատվություն էր տարածել այն մասին, որ Բաքվի Սաբունչիի շրջանում հայտնաբերվել է Հայաստանի քաղաքացուն պատկանող վարորդական իրավունքի վկայական: Ըստ Oxu.Az կայքի, վարորդական վկայականն իր տան բակում գտել է Բաքիխանով ավանի բնակիչ Իլկին Մամեդովը: Գտնված փաստաթուղթը (BC տեսակի վկայականը՝ տրված 2014 թվականի օգոստոսի 27-ին, վկայականի համար՝ RG 052597) նա հանձնել Սաբունչիի շրջանի ոստիկանության 13-րդ բաժանմունք: Նշվում է նաեւ, որ Ադրբեջանի ԱԱԾ-ն հետաքննություն է սկսել, որպեսզի պարզի, թե ինչպես է փաստաթուղթը հայտնվել Ադրբեջանի տարածքում: Գեւորգ Առաքելյանին մի քանի հարց ուղղեցինք եւ ոչ միայն վկայականի վերաբերյալ.

— Պարոն Առաքելյան, ըստ ձեզ ձեր որդու վկայականը ինչպե՞ս է հայտնվել Ադրբեջանում:

— Զոհվելու օրը Ալիկի բոլոր փաստաթղթերը գրպանից հանել էին: Հեռախոսը, ժամացույցը, բանկի քարտը, անձնագիրը, վարորդական իրավունքի վկայականը, գումար՝ ամբողջը դատարկել էին:

— Ադրբեջանցինե՞րը:

— Այո, դե 10 օր իրենց մոտ է եղել դին:

— Այդ դեպքում ինչպես է հայտնվել ինչ-որ քաղաքացու տան մոտ:

— Ո՞վ գիտի, միգուցե ադրբեջանական կողմից քաղաքացիական անձ է այդ օրը կռվին մասնակից եղել: Ես չեմ կարող ասել: Միայն գիտեմ, որ դիակի զննության ժամանակ Ալիկի համազգեստի գրպանները շուռ էին տված: Նույնիսկ մի գրիչ չկար գրպանում: Վիլիսի բանալիները եւս վերցրել էին:

— Փորձե՞լ եք պարզել, թե որտեղ են փաստաղթեթրը:

— Չէ, չեմ փորձել: Նոր իմացա, որ վարորդական իրավունքի վկայականն են գտել:

— Իսկ ըստ ձեզ նրանք չգիտե՞ն, թե դա ում փաստաթուղթն է, ինչո՞ւ են հետաքննություն սկսել:

— Ո՞նց կարող է չիմանան: Էդ ի՞նչ պիտի քննեն: Ուրեմն մի բան մտածել ես, ես դա չեմ կարող ասել:

— Պարոն Առաքելյան, եթե կարելի է խոսենք նաեւ ձեր որդու ընտանիքի բնակարանի խնդրից: Դուք հրաժարվել էիք «SOS Գյումրի» ծրագրի միջոցով պատգամավոր Արման Սահակյանի կողմից ձեզ տրամադրված բնակարանից՝ նշելով, որ տեղն ու պայմանները հարմար չեն: Ձեզ հաջողվե՞ս լուծել բնակարանի խնդիրը:

— Հենց հիմա, ներկա պահին «Գազպրոմ Արմենիա» ընկերության գլխավոր տնօրեն Վարդան Հարությունյանն ու Շիրակի մասնաճյուղի տնօրեն Սերգեյ Ամիրբեկյանը փաստաթղթային հաշվառումներ են անում, զոհված հերոսին բնակարան են նվիրել: Ես իրենց ցավը տանեմ:

— Որտե՞ղ է գտնվում:

— Գյումրիում է գտնվում, մեր տան մոտ, կահավորված բնակարան է: Ամբողջ նվիրատվությունը կազմել է 50 հազար դոլար: Տան բանալիներն էլ, վկայականն էլ արդեն մեր ձեռքում են: Հերոսի ընտանիքը այդ բնակարանում է ապրում:

— Հունիսի 16-ի Գյումրիի ավագանու նիստում քննարկվելու է Գյումրիի Մուշ-2 թաղամասի փողոցներից մեկը ապրիլյան պատերազմում զոհված 7 գյումրեցի հերոսների անունով կոչելու հարցը: Ի՞նչ զգացողություն է դա ձեզ համար:

— Լավ է, նպատակ են դրել, թող անեն: Ալեքսանի համար նույն «Գազպրոմը» մի հատ լավ հուշարձան է սարքում, հենց մեր փողոցն էլ կարելի էր իր անունով դնել:

— Ո՞ւմ անունն է հիմա կրում ձեր փողոցը:

— Պուշկինի:

armtimes.com