Հեղինակային իրավունքի հարցերով ադրբեջանական գործակալությունը վրդովմունք է հայտնել, որ իրենց «ազգային պար», «Ուզունդերեն» օրերս մոսկովյան «Սաֆիսե» հանդիսությունների սրահում կայացած «Տաշիր» ընկերությունների խմբի նախագահ Սամվել Կարապետյանի որդու՝ Սարգիս Կարապետյանի հարսանիքի ժամանակ ներկայացվել է որպես հայկական:

Նշենք, որ ինչպես հաղորդում է Apa.az-ը, Ադրբեջանի հեղինակային իրավունքի գործակալությունը փորձում է ուշադրություն հրավիրել է այն հանգամանքի վրա, որ պարը ձայնադրվել է իրենց հայտնի երգահան Ուզեիր Գաջիբեկովի կողմից 1910թ-ին գրված «Ոչ այն, ինչպես սա» երաժշտական կոմեդիայում:

Լրատվական կայքը հայտնում է, որ հեղինակային իրավունքների գործակալությունը առաջիկայում իր պաշտոնական տեսակետը կհայտնի «Մտավոր սեփականության համաշխարհային կազմակերպությանը» և համապատասխան միջազգային կառույցներին:

Մինչդեռ բոլորին է հայտնի որ «Ուզունդարան» կամ «Հարսի պար»-ը, հայկական ավանդական, ծիսական պարերից է, «Ուզունդարան» հիմնականում պարվել է հարսանեկան արարողությունների ժամանակ։ Պարը կատարվում է հարսի կողմից` միայնակ կամ մի խումբ կանանց հետ միասին։

Ըստ հայկական աղբյուրների` Ուզուն և Դարաբառերի բացատրությունը տրված է Հրաչյա Աճառյանի «Արմատական» և «Նոր Հայկազյան» բառարաններում։ Ուզուն բառն առաջացել է`

1. Ուզել բառից
2. Ուզ` /հարսի և փեսայի գլխին դրվող ծաղկեպսակ/ բառից

Դարա բառն առաջացել է`

1. Դար բառից
2. Դարան` թաքստոց, թաքուն բառից

Այսինքն` Ուզունդարա նշանակում է գաղտնի պսակ դնել։

«Այս պարն իր ծագմամբ նման է Կինտոների պարին, որը խառնածին մշակույթ է, բայց այն հիմնականում պարել են հենց հայերը: «Ուզունդարայի» վրա ևս մեծ ազդեցություն ունեն կովկասյան պարերը, և այն առաջացել է Հայաստանի՝ այսպես ասած Ռուսահայաստան դառնալուց հետո, բայց այն ևս պարել են հայերը»,- պարի ծագումնաբանությունը այսպես է մեկնաբանել պարուսույց Գագիկ Գինոսյանը:

Այն, որ պարը չի կարող լինել ադրբեջանական, Գագիկ Գինոսյանը ընդգծում է առանձնակի:

«Նրանք նախ պետք է մշակույթ ունենան, որ հետո հավակնություններ ներկայացնեն: Ամբողջ աշխարհը գիտի, որ նման ազգ անգամ գոյություն չի ունեցել: Միայն 1918թ-ին Ռուսաստանի կողմից է պետությունը հիմնադրվել: Դա նույնն է, որ նրանք հայտարարում են, որ Սայաթ-Նովան ադրբեջանական երգեր է գրել, նման լեզու չի եղել, որ Սայաթ-Նովան էլ գրեր: Սա Սովետական միության կողմից բարեկամություն բառի տակ խցկված մի պետություն է: Պարը ադրբեջանական չէ, դա նույնիսկ քննարկման հարց չի կարող լինել»,- Tert.am-ին տված հարցազրույցում ասել է պարուսույցը:

Ինչ վերաբերում է Ուզեիր Գաջիբեկովի աշխատանքին, ապա պարի մասնագետը նշեց, որ հաճախ ստեղծագործողները վերցնում են ազգային պարերն ու երգերը և փոփոխություննրի ենթարկում, ինչպես դա անում է Հայաստանում երգահան Արա Գևորգյանը և մի շարք այլ ստեղծագործողներ:

«Բայց սա չի նշանակում, որ դա այդ մարդու ստեղծագործությունն է, դե լավ է, որ ադրբեջանցիները չեն ասում, թե հենց Գաջիբեկովն է պարի հեղինակը»,-ասաց նա: