Հայերը ցեղասպանություն են իրականացրել Խոջալիում, որը ճանաչել են աշխարհի 10 երկրներ:

Այդ ցեղասպանությունն իրականացվել է վերջերս՝ միջազգային հանրության աչքերի առջև: Հայերն օկուպացված տարածքներում ավերել են մեր պատմական հուշարձանները, մզկիթները»:

Այս մասին Գերմանիայի կանցլեր Անգելա Մերկելի հետ հանդիպման արդյունքներով հրավիրված մամուլի ասուլիսում ասել է Ադրբեջանի նախագահ Իլհամ Ալիևը, տեղեկացնում է Armenia.Az-ը՝ վկայակոչելով haqqin.az-ին:

Վերջինս նշել է, թե Ադրբեջանը ցանկանում է հակամարտության շտապ խաղաղ կարգավորում, իսկ շփման գծում վերջին իրադարձությունները ցույց տվեցին, թե որքան անկայուն է հրադադարի ռեժիմը: Այնուհետ Ալիևը մեղադրել է հայկական կողմին շփման գծում սադրանքների դիմելու համար:

«Լեռնային Ղարաբաղի ստատուս-քվոն պետք է փոխվի: ԵԱՀԿ Մինսկի խմբի համանախագահները և համանախագահող երկրների ղեկավարները հայտարարել են ստատուս-քվոյի անընդունելի լինելու մասին: Ադրբեջանը շարունակում է մնալ հավատարիմ հակամարտության խաղաղ կարգավորմանը»,- շեշտել է Ալիևը:

Ալիևը անդրադարձել է նաև ապրիլյան պատերազմում հայկական կողմի տարածքների կորստին՝ նշելով.

«Ավելի քան 20 տարի է նրանք օկուպացման տակ են պահում այդ հողերը՝ անտեսելով միջազգային իրավունքը: Ղարաբաղյան հակամարտությունը կարող է կարգավորվել միայն Ադրբեջանի օկուպացված տարածքների ազատումից հետո: Ժամանակ առ ժամանակ հայերը շփման գծում սադրանքներ են ձեռնարկում: Դա արվում է բանակցային գործընթացը խոչընդոտելու համար: Սակայն, նրանք ճիշտ չէին հաշվարկել ապրիլին տեղի ունեցած վերջին սադրանքի հետևանքները: Մենք կարողացանք ազատագրել մեր տարածքների մի մասը: Հայաստանի ղեկավարությունը չպետք է մոռանա այս դասը: Նրանք պետք է լսեն ԱՄՆ, Ռուսաստանի և Ֆրանսիայի առաջնորդների՝ ստատուս քվոյի անընդունելության մասին հայտարարությունները»։