Ադրբեջանական «Ենի Մուսավաթ» ընդդիմադիր համարվող թերթը գրում է, որ հնարավոր է ՆԱՏՕ-ի մասնակցությամբ Մերձբալթիկայի երկրները թեժ պատերազմ սկսեն Ռուսաստանի դեմ: Ու եթե այն սկսվի, Ռուսաստանի ուշադրությունից դուրս կմնա Անդրկովկասը, և Ադրբեջանի ձեռքերը կապանքներից կազատվեն Ղարաբաղն ուժով վերցնելու համար:

«Ռուսաստանը հիմնական զսպող ռազմաքաղաքական գործոնն է ղարաբաղյան կոնֆլիկտը ռազմական ճանապարհով լուծելու հարցում: Եթե Ռուսաստանը ներքաշվի ՆԱՏՕ-ի հետ հակամարտության մեջ, նա չի կարող լուրջ ուշադրություն դարձնել կոնֆլիկտին, և Ադրբեջանի դեմ պատերազմին մասնակցել` ի օգուտ Երևանի: Նրանք չեն համարձակվի, այլապես ՆԱՏՕ-ի անդամ Թուրքիան երկրորդ ճակատ կբացի, որով շահագրգռված է ՆԱՏՕ-ն: Բաքուն բացառիկ շանս կստանա և վճռորոշ պահին կզարգացնի ռազմական հզոր պոտենցիալը Թուրքիայի, Իսրայելի Պակիստանի և նույնիսկ հենց Ռուսաստանի հաշվին»:

Հակառակ կարծիք է տպագրել Axar.az-ը: Միլլի մեջլիսի անվտանգության և պաշտպանության հանձնաժողովի անդամ, պատգամավոր Զախիդ Օրուջը հայտարարել է. «Ես չեմ կիսում որոշ մարդկանց պարզամիտ կարծիքը, թե Արևմուտքի զինված ուժերը Վրաստանով կգան Ղարաբաղը գրավելու…»:

Նա երկրի համար վտանգավոր է համարել նաև Վրաստանի, Թուրքիայի և Արդբեջանի զինված ուժերի զորավարժությունների վրա հույս դնելը: Նա դա համարում է հակառուսական բլոկի նման մի բան, որը խիստ կվտանգի երկրի անվտանգությունը:

Օրուջը հիշեցրել է Վրաստանի և Ռուսաստանի 5-օրյա պատերազմը. «2008թ. ամերիկյան զինվորականները պետք է կանգնեին Սահակաշվիլու կողքին, բայց դա չեղավ, և Վրաստանը պարտվեց ընդամենը 5 օրում»:

nyut.am