Հետախուզա-դիվերսիոն առաջին խմբի հիմնադիր-հրամանատար Վովա Վարդանովը, ինչպես հայտնի է, հատուկ պարապմունքներ է սկսել՝ նպատակ ունենալով բարձրացնել քաղաքացիների մարտունակությունը:

Արագացված մարտական դասընթացներ մինչեւ մայիսի 6ը կանցկացվեն նաեւ Գյումրիում: Այսօր, երբ Վովա Վարդանովի գլխավորած խումբը վարժանքներ էր անցկացնում Գյումրու Բուլվարայինից Վարդբաղ թաղամաս տանող խոտածածկ հատվածում, որն այնքան էլ հեռու չէ ռուսաստանյան զորամասից, վարժանքների մասնակիցները տարածքում հայտնաբերել են հակատանկային ականներ:

Տեղում մեզ Վովա Վարդանովը ներկայացրեց, թե ոչ բոլոր ականներն են հանել համապատասխան վայրից, դա համարում են մասնագետների գործը, ովքեր էլ պարզելու են նաեւ` դրանք ուսումնական, թե՞ մարտական ականներ են:

«Ականների վտանգավորությունն ինձ թվում է անիմաստ է անգամ նկարագրելը՝ հաշվի առնելով, որ սրանք հակատանկային ականներ են մոտ 5 կգ պայթուցիկ նյութը մեջը: Հիմա մենք 3 հատ հանել ենք, 4-րդը պայթուցիչ էր , որը ձգվում է ականի վրա ու դառնում է մարտական զենք, ու կարող է մի հատ 50 տոննանոց տանկ ոչնչացնել: Շատ վտանգավոր բան է, էն ինչ մենք տեսնում ենք, ուղղակի հանցավոր է»:

Ձորակի հարակից տարածքում եւս նմանատիպ ականներ են հայտնաբերել դասընթացների մասնակիցները: Վովա Վարդանովը նշում է, եթե ուժի գործադրում իրականացվի, ապա շատ հավանական է, որ ականները պայթեն, ու հիշեցնում է Վարհրամաբերդ գյուղում երկու տարի առաջ տեղի ունեցածը, երբ համայնքի երկու անչափահաս երեխաներն ականի պայթյունից մահացան: Այդ ժամանակ, հիշեցնենք, պարզվեց, որ Վահրամաբերդի արոտավայրերում հաճախակի զորավարժանքներ են իրականացնում Գյումրիում տեղակայված ռուսաստանյան զորքերը: Ու քանի որ այս տարածքն էլ զորամասից ոչ հեռու է, ապա մասնագետների կարծիքով, հավանաբար, սա էլ նրանց անփութության ու անզգուշության հետեւանք է:

«Մենք, երբ վարժանքներ էինք անցկացնում, երկու կին փոքր երեխաների հետ սինձ էին հավաքում, շատ հանգիստ իրենց հետ կարար մի բան պատահեր, ճիշտ է հիմա հատուկ մասնագետները կասեն, սրա վրա պետք է հատուկ դետոնատոր դրվի, բայց ես նոր նաեւ դետոնատորը ցույց տվեցի, վրան էր, ու ցանկացած երեխա կարող է գա ու վնասի իրեն, կարող է դրա վրա համապատասխան ճնշում, ուժ  գործադրվի  ու շատ սարսափելի հետեւանքներ ունենա: Հիմնականում զորախաղերի ժամանակ վառելիք, պայթուցիկ դուրս է գրվում, երեւի վառելիքը կերել են, դա իմ ենթադրությունն է ու պայթուցիկը թափել են իրենց պարսպից դուրս: Եթե անգամ մտածում են, որ սա աղբանոց է, բայց աղբանոցի մեջ ական չեն գցում, ոնց կարելի է  նման վերաբերմունք ունենալ. լավ, հասկացանք, որ մի քիչ փնթի ժողովուրդ են, բայց սա ցելոֆան չի, 50 տոննանոց տանկը օդ է հանում»,-նշեց Վովա Վարդանովը:

Համապատասխան ահազանգից հետո  դեպքի վայր եկան մարզային փրկարարական վարչության աշխատակիցները, այնուհետ ոստիկանության, ազգային անվտանգության ծառայության ներկայացուցիչները, ովքեր սկսեցին դեպքի վայրի զննություն իրականացնել, նաեւ ժապավենապատեցին այն հատվածները, որոնք վտանգավոր են համարվում, եւ տարածք հրավիրեցին սակրավորների:

galatv.am