«168 Ժամ» թերթը՝ հենվելով ռուսական փորձագիտական շրջանակների տեղեկատվության վրա, մանրամասներ է հաղորդում «Սմերչի» մասին: Ըստ այդմ՝ «Սմերչ»-ը համարվում է այս պահի դրությամբ աշխարհի հզորագույն համազարկային հրթիռային համակարգը։ Կործանիչ ուժով այն զիջում է միայն ատոմային ռումբին։  «Սմերչ»-ը արձակում է 12 կրակոց ընդամենը 40 վայրկյանում։ 30մմ-անոց հրթիռները հաղթահարում են 90կմ հեռավորություն եւ անվրեպ խոցում թիրախը։ «Սմերչ»-ի մեկ հրթիռը ոչնչացնում է կենդանի ամեն ինչ 67հա մակերեսով (130 ֆուտբոլի դաշտ)։ «Սմերչ»-ի ամենամոտ մրցակիցը՝ ամերիկյան MLRS-ը, ունի ընդամենը 40կմ հեռավորություն, իսկ ճշգրտության աստիճանը բավականին ցածր է։ «Սմերչ»-ն ունի թռիչքի կառավարման համակարգ։ Այսինքն՝ թիրախին չհասնելը կամ դրանից անցնելը բացառվում է։ Համակարգը նաեւ ավտոմատ կարգավորում է հրթիռի արագությունը։ «Սմերչ»-ի առանձնահատուկ գծերից մեկն այն է, որ յուրաքանչյուր հրթիռ մինչեւ թիրախին հարվածելը բաժանվում է 500 ֆուգասային-բեկորային արկերի՝ այդպիսով խոցելով բավականին մեծ մակերես եւ շարքից հանելով հակառակորդի կենդանի ուժն ու տեխնիկան։ Սակայն սա դեռ ամենը չէ. «Սմերչ»-ը կարող է հակատանկային արկեր տարածել մեծ հեռավորության վրա։ Այսինքն՝ համակարգի օգնությամբ կարելի է ականապատ դաշտ ստեղծել հենց հակառակորդի քթի տակ։ «Սմերչ»-ը ունի նաեւ հատուկ բաղադրիչ, որը հրթիռից առանձնանալով՝ կարող է ինքնուրույն հայտնաբերել տանկն ու ոչնչացնել այն։ Եվ վերջին նորարարություններից. «Սմերչ»-ը այժմ կարող է հրթիռի հետ հակառակորդի տարածք տեղափոխել անօդաչու ինքնաթիռ, որը 1.5 ժամ կպտտվի տարածքի վրա եւ տվյալներ կփոխանցի, թե հարվածն ինչ արդյունք է տվել։ Այս ամենը «Սմերչ»-ի հնարավորությունների միայն մի մասն է, որը գաղտնազերծված է եւ հրապարակման ենթակա է (http://168.am/2013/07/02/245685.html )։

Ըստ ռազմական փորձագետ Հրաչյա Պետրոսյանցի եզրակացության, ինչպես ցանկացած ռազմական տեխնիկա, «Սմերչ» կայանքները հանդիսանում են մահաբեր միջոցներ ինչպես զինված ուժերի, այնպես էլ քաղաքացիական բնակչության համար, սակայն դրանք չեն կարող համարվել ատոմային ռումբից հետո ամենահզոր զենքը կամ ԶՈԶ միջոց, որից մենք պիտի սարսափահար լինենք: