«Ներկայումս պատերազմներն անցել են որակական նոր մակարդակի, ուստի Հայաստանը վերանայելու որոշ խնդիրներ ունի. ժամանակն է պաշտպանության ոլորտ ընդգրկել նաև տեղեկատվական տեխնոլոգիաների ոլորտի մասնագետներին»,- նկատում է տեղեկատվական անվտանգության հարցերով փորձագետ Սամվել Մարտիրոսյանը:

Ըստ նրա` ղարաբաղա-ադրբեջանական հակամարտ զորքերի շփման գծում ծավալված վերջին ռազմական գործողությունները ցույց տվեցին, որ ներկայիս պատերազմները, երբ կիրառվում են անօդաչու թռչող սարքեր, «Սմերչեր» և «Գրադներ», ավելի դժվար կանխվող են և տնտեսապես հակառակորդի համար ավելի արդյունավետ պայքարի միջոցներ են:

Ս. Մարտիրոսյանի խոսքերով` Արցախում տեղի ունեցած քառօրյա պատերազմի հետևանքով հայկական կողմի կորուստների զգալի տոկոսն արդյունք է Ադրբեջանի կողմից կիրառված դրոնների, հետևաբար ժամանակն է, որպեսզի Հայաստանն օգտագործի ՏՏ ոլորտում ունեցած կադրային ներուժը:

«Պետք է նկատենք, որ այսօր միշտ չէ, որ «Գրադերը» և «Սմերչներն» այդքան արդյունավետ են լինում, հետևաբար անհրաժեշտ է, որ մենք այս պատերազմում ներգրավենք նաև մեր ՏՏ ոլորտների մասնագետներին»,- ընդգծեց նա` հավելելով, որ այսօր Ադրբեջանը զենք է գնում ոչ միայն ՌԴ-ից, այլ Իսրայելից:

Մասնագետի համոզմամբ`  Իսրայելն Ադրբեջանին զինում է նաև ռադիոէլեկտրոնային պայքարի միջոցներով, ինչը լուրջ խնդիրներ կարող է առաջացնել հայկական բանակի համար: