«Իմ գնահատմամբ՝ մարտի 1-2-ի իրադարձությունների մասնակից պետական կառույցների, հանցավոր խմբերի դերակատարությունը մինչև վերջ ուսումնասիրված, քննված, բացահայտված չէ»,- երեկ նման գնահատական է հնչեցրել ԱԺ ՀԱԿ խմբակցության պատգամավոր, նախկին զինդատախազ Գագիկ Ջհանգիրյանը։

Անդրադառնալով մարտի 1-ի ոճրա­գործության իրավական նր­բերանգներին՝ նախկին զինդատախազը մանրամասնել է.

«Մինչև այժմ մենք չունենք իրավական գնահատական, թե իշխանությունն ինչպես է գնահատում զինված ուժերի մասնակցությունը մարտի 1-ի դեպքերին և դրանից ավելի վաղ։ Պաշտպանության նա­խարարի հույժ գաղտնի 0038 հրամանի իրավական գնահատականը չունենք։ Մենք տեղեկացված չենք կամ այդ առումով քննություն չի կատարվել, թե ինչպիսի մաս­նակցություն են ունեցել ապօ­րինի զինված խմբավորումները։ Եթե հիշում եք՝ թե բանա­կի ապօրինի ներգրավման, թե զինված խմբերի մասնակ­ցության վերաբերյալ Փաս­տահավաք խումբը զեկույց­ներ էր հրապարակել։ Մենք չունենք նույնիսկ դեպքի վայ­րից առգրավված մի քանի 100 գնդակների և փամփուշտնե­րի նույնականացման տվյալները, չկա։ 2011 թվականի դեկտեմբերին հրապարակ­ված վերջին տեղեկատվության համաձայն՝ ՀՔԾ-ն հայտարարել էր, որ փամփուշտ­ները չեն նույնականացվել։ Նույնիսկ երեք սպանվածների մարմիններից հանված փամ­փուշտների նույնականացում չկա, թե ում զենքից և ովքեր են կրակել»։

Այս իրավիճակը, սակայն, Ջհանգիրյանի կարծիքով, պատահական չէ։ Նա համոզված է, որ ոչ թե իրավապահ մարմինները չեն կարող բացահայտել մարտի 1-ը, այլ իշխանությունների մեջ չկա այդ սպանությունները բացահայտելու կամք կամ ցանկություն։ Եվ եթե լինի քաղաքական կամք, սպանություններն արագ կբացահայտվեն, ու տասնյակ մարդիկ կպատժվեն։

«Չեմ ասում հազարավոր մարդկանց բանտ նետեին, բայց տասնյակ մարդիկ պետք է պատժվեին»,- ասել է նա և հավելել,- «Այդ քայլով հնարավոր կլիներ կանխել նման իրադարձությունների կրկնությունն ապագայում։ Իսկ այժմ մենք նոր մարտի մեկերից ապահովագրված չենք»։

Չորրորդ իշխանություն