ՀՀ տարածքային կառավարման եւ արտակարգ իրավիճակների նախարարության օդերեւութաբանության կենտրոնի պետի տեղակալ Գագիկ Սուրենյանը ֆեյսբուքյան իր էջում գրել է. «Ժողովուրդը ասում է, որ տերնդեզի խարույկը վառվելուց հետո ձմեռը վերջանում է, և օրերը սկսում են կտրուկ տաքանալ, և դա համարվում է ձմռան ավարտը ու գարնան սկիզբը: Ես այդքան էլ ուշադրություն չէի դարձնում այդ ժողովրդական ասածվացքին, բայց քանի որ, այդ հարցով ինձ արդեն դիմեցին լրագրողները և բազմաթիվ անհատներ, որոշեցի ճշտեմ ժողովրդական ասածվացքի ճշմարտացիությունը:

1930-2015 թվականների վիճակագրական վերլուծությունը տվեց հետևյալ պատկերը. Այո, եղել են տարիներ, որ փետրվարի 13-ից հետո եղանակը կտրուկ տաքացել է, ինչը բնականաբար պայմանավորված է եղել ոչ թե տերնդեզին խարույկ վառելու ավանդական սովորույթով, այլ հարավային տաք օդային զանգվածների ներթափանցմամբ, բայց եղել են տարիներ, երբ փետրվարի 13-ից հետո, Արարատյան դաշտում և ողջ հանրապետությունում սկսվել են այնպիսի սաստիկ ցրտեր և ձյան առատ տեղումներ, որ չէին եղել ողջ ձմռան ընթացքում:

Օրինակ՝ 1933, 1969, 1985 թվականներին տերնդեզի կրակը վառելուց անմիջապես մեկ օր հետո օդի ջերմաստիճանը Արարատյան դաշտում և Երևանում գիշերը -5…-8 աստիճան ցրտից նվազել է -25…-28 աստիճան, իսկ այլ տարիների, մասնավորապես` 1931, 1934, 1949, 1959, 1993, 1994, 2005, 2006, 2012թթ-ին, -4…-5 աստիճան գիշերային ցրտերը փոխարինվել են -15….-20 աստիճան սառնամանիքների:

Այնպես որ, սիրելի ժողովուրդ, հիմա դուք եզրակացրեք, թե որքանով է ճիշտ ժողովրդական այդ ասածվացքը և տերնդեզի խարույկի մոգական, եղանակաստեղծ ուժը: Կից ներկայացված է նաև նշված տարիների օդի նվազագույն ջերմաստիճանը ըստ օրերի Արարատյան դաշտում»: