Բանակի դերակատարությունն անվտանգության համակարգի ձևավորման մեջ առաջնային է: Այս մասին այսօր Երևանի պետական համալսարանում համալսարանի պրոֆեսորադասախոսական կազմի ներկայացուցիչների և ուսանողների հետ հանդիպմանն ասել է ՀՀ պաշտպանության նախարար Սեյրան Օհանյանը:

«Անվտանգության միջավայրն այսօր բավականին փխրուն է ու փոփոխական: Մենք բավականին սպառնալիքներ ունենք, բայց մեր զինված ուժերը, բանակը կարողանում է իր պատրաստվածությամբ, զինծառայողների մարտական ոգու, բարոյահոգեբանական բարձր համակարգի շնորհիվ պահպանել հարաբերական խաղաղությունը: Բանակը կարողանում է այս զինված դիմակայության պարագայում ստեղծել այնպիսի զսպիչ մեխանիզմներ, որն ստիպում է հակառակորդին զերծ մնալ խոշորամասշտաբ գործողություներից, և մարտական գործողությունների վերածվելու հավանականությունը հավասարեցնել մինիմումի»,- նշեց նախարարը:

Նախարարը նաև տեղեկացրեց, որ բանակում արգելել է օգտագործել երկու արտահայտություն. առաջինը չասել, որ բանակը հասարակության հայելին է, քանի որ գտնում է, որ դրանով կարծես արդարեցնում են այն դեպքերը, որոնք մերթընդմերթ լինում են բանակում, իսկ երկրորդը արգելել է ասել, թե բոլոր բանակներում էլ այդպիսի դեպքեր լինում են: