Ձյան առատությունը եւ ցուրտ եղանակը վերջին օրերին մեզ համար կարծես թե սովորական են դարձել, իսկ ճանապարհներին ժամանակին աղ եւ ավազ չլցնելու հետեւանքով վթարների թիվը գնալով ավելանում է: Արդյո՞ք ձյան առատությունն ունի առավելություններ, վերջին անգամ ե՞րբ է գրանցվել նվազագույն ջերմաստիճանը, ջերմաստիճանը նորից կիջնի՞, թե՞ կբարձրանա. այս եւ այլ հարցերին պատասխանել է Հիդրոմետ ծառայության օդերեւութաբանության կենտրոնի պետի տեղակալ Գագիկ Սուրենյանը: «Նվազագույն ջերմաստիճան վերջին անգամ գրանցվել է 2008թ.-ին, բայց ոչ թե եղել է -18 աստիճան, ինչպես հունվարի 28-ի գիշերը, այլ -24-ից մինչեւ -25 աստիճան ցուրտ հենց մայրաքաղաքում, իսկ լեռնային շրջաններում -30-ից մինչեւ -36 աստիճան ցուրտ» – նշեց Սուրենյանը:

Ըստ Սուրենյանի՝ ձյան առատությունը միայն դրական կողմեր ունի. «Այն դրական ազդեցություն է ունենում բոլոր առումներով. եւ գյուղատնտեսական, եւ ջերմատնտեսական: Այս տարի, ինչպես եւ կանխատեսվում էր, մենք ունեցանք տեղումնառատ հունվար: Առանձին հատվածներում, մասնավորապես Մարտունիում, տեղումների ամսական քանակը կազմել է նորմայի վեցնապատիկը, որը միայն դրական ազդեցություն կունենա. լեռների ձյունածածկը գարնանը հիմնականում ապահովում է գետերի հորդացումները, ջրամբարների լցվածությունը, Սեւանա լճի բնական հաշվեկշիռը, իսկ գյուղատնտեսական առումով ձյունածածկը միշտ էլ աշնանացանը պաշտպանում է ուժեղ ցրտերից, իսկ գարնանը ապահովում է հողում արդյունավետ խոնավության պաշարները»:

Ցրտի եւ ջերմաստիճանի հավանական բարձրացման մասին հատկապես մեծերն ունեն իրենց կանխատեսումները: Նրանք հաճախ ասում են,որ ցուրտ ձմռանը հաջորդում է տաք ամառը, կամ որ Տեառնընդառաջից հետո ջերմաստիճանը բարձրանում է: Անդրադառնալով այս տեսակետներին՝ Սուրենյանը հերքեց դրանք. «Ոչ մի կապ գոյություն չունի ձմռան եւ ամռան ջերմային ֆոների միջեւ. դրանք մեզ ցույց են տվել գիտական ուսումնասիրությունները: Ինչ վերաբերում է նշված երկրորդ տեսակետին, ասեմ, որ դա եւս սխալ է, որովհետեւ վիճակագրական նյութերի տեսությունը ցույց է տվել, որ եղել են տարիներ, երբ Տեառնընդառաջից հետո օդի ջերմաստիճանը նվազել է, օրինակ ՝ 1985 թվականին փետրվարի 15-ից հետո մայրաքաղաքում օդի ջերմաստիճանը նվազել է մինչեւ -20 աստիճան, իսկ մարտի առաջին օրերին՝ -25 աստիճան»:

Ըստ Գագիկ Սուրենյանի՝ «Ամիսը կլինի տաք, ջերմաստիճանը կլինի ամսական նորմայից 1-2 աստիճանով բարձր, եւ տեղումների քանակը նորմայից ավելի: Սպասում ենք տաք փետրվարի» :