Ըստ «Հայկական ժամանակի»-ի հավաստի աղբյուրների, առաջիկայում Ազգային անվտանգության ծառայության մամուլի խոսնակ է նշանակվելու Հանրային հեռուստաընկերության աշխատակից Կարեն Հակոբյանը: Նա համարվում է Հ1-ի վարչական բաժնի աշխատակից:

Իրականում Հակոբյանը ԱԱԾ աշխատակից է, որը փաստորեն, «կանտռոլի տակ» է պահել Հ1-ի անցուդարձը:

Հիշեցնենք, ԱԱԾ մամուլի քարտուղարի պաշտոնը Արծվին Բաղրամյանի մահից հետո տեւական ժամանակ է, թափուր է եւ լրագրողները շատ դեպքերում դժվարանում էին որեւէ հարցով մեկնաբանություն ստանալ ԱԱԾ-ից: Մեզ հայտնի դարձավ նաեւ, որ Հ1-ում Կարեն Հակոբյանի փոխարեն արդեն մի քանի օր է, այլ անձ է աշխատում:

Ենթադրվում է, որ Հակոբյանի նշանակման մասին պաշտոնապես կհայտարարվի փետրվարին:

«ՀԺ»-ն նախկինում բազմիցս գրել է, որ այս տարվա փետրվարի 11-ին լրանում է ԱԱԾ երկարամյա ղեկավար Գորիկ Հակոբյանի պաշտոնավարման ժամկետը ու չի բացառվում, որ ԱԱԾ նոր խոսնակի անունը պաշտոնապես հայտնի դառնա ԱԱԾ նոր ղեկավարի անվան հետ միաժամանակ: Հիշեցնենք, ԱԱԾ նոր ղեկավարի ամենահավանական թեկնածուն համարվում է Սահմանադրական դատարանի նախագահ Գագիկ Հարությունյանի եղբայրը՝ ԱԱԾ տնօրենի տեղակալ Արզուման Հարությունյանը:

Ի դեպ, երբ դեռ ամիսներ առաջ ԱԱԾ տնօրենի պաշտոնում իր հնարավոր նշանակման մասին փորձել էինք մեկնաբանություն ստանալ Արզուման Հարությունյանից, նա, նախ, հայտարարել էր, թե այդ բոլոր խոսակցությունները անհեթեթություններ են, կգա ժամանակը, ամեն ինչ էլ կիմանաք, իսկ հարցին` այդուհանդերձ՝ եթե ձեզ նման առաջարկ լինի, կընդունե՞ք՝ Հարությունյանը պատասխանել էր. «Առաջարկ չի լինում, նշանակում է հանրապետության ղեկավարը, եւ հանրապետության ղեկավարը ում կնշանակի, նա իր պարտականությունները կկատարի»:

Նկատառմանը, որ որեւէ պաշտոնում նշանակելիս նաեւ տվյալ անձի համաձայնությունն է անհրաժեշտ, Արզուման Հարությունյանն արձագանքելն էր. «Ես զինվորական եմ, այնտեղ էլ կաշխատեմ»:

Իշխանական շրջանակներում խոսվում է, որ ԱԱԾ դեռեւս գործող տնօրեն Գորիկ Հակոբյանը, ով այս տարի կբոլորի իր 70-ամյակը, դեռեւս կմնա ԱԱԾ-ում որպես Սերժ Սարգսյանի ներկայացուցիչ: