«Արմավիրի» ՔԿՀ-ում հունվարի 4-ին  ինքնասպան եղած 21-ամյա Անզոր Կարապետյանը, ով կալանավորվել էր սպանության փորձի մեղադրանքով և կալանավայրում էր գտնվում ընդամենը 1 օր: Շրջանառվող տեղեկությունների համաձայն՝ նա եղել է կարանտինում, ինչը նշանակում է, որ նա խցում միայնակ է եղել: Այս տեղեկությունը քրեակատարողական հիմնարկից ճշտել չհաջողվեց։

Կալանավորի ինքնասպանությունից հետո կատարված դիակի դատաբժշկական փորձաքննությամբ՝ նրա մարմնի վրա հայտնաբերվել են վնասվածքներ:

«Փաստինֆո»-ն ավելի վաղ հայտնել էր, որ կալանավորի ինքնասպանության փաստով հարուցվել է քրեական գործ՝ ՀՀ քրեական օրենսգրքի 110-րդ հոդվածի 1-ին մասով (ինքնասպանության հասցնել):

Այս պատմության հետքերով գնալով՝ պարզեցինք, որ երիտասարդը իրավապահների ուշադրության կենտրոնում է հայտնվել դանակահարության համար. նա դեկտեմբերի 31-ին վիճաբանել է չորս այլ երիտասարդների հետ:

Տղայական վիճաբանության պատճառն էլ, պարզվում է, աղջիկ է եղել։ Մեր տվյալներով՝ վիճաբանությունը վերածվել է ծեծկռտուքի, որն էլ ավելի ուշ զարգացում է ունեցել և ավարտվել դանակահարությամբ, ինչի համար նրան մեղադրանք էր առաջադրվել սպանության փորձի համար։

Նշենք նաև, որ Կարապետյանը իրավապահների ուշադրության կենտրոնում է հայտնվել նաև զինվորական ծառայության ընթացքում:

Գտնվելով պարտադիր ժամկետային ծառայության մեջ՝ Կարապետյանը վիճաբանել է իր նկատմամբ պետ հանդիսացող կրտսեր սերժանտի հետ և բռնություն գործադրել նրա նկատմամբ:

ՀՀ քրեական օրենսգրքի 358-րդ հոդվածի  2-րդ մասով առաջադրված մեղադրանքում Կարապետյանն իրեն մեղավոր է ճանաչել ու միջնորդել գործը քննել արագացված ընթացակարգով:

Այսպիսով, Սյունիքի մարզի ընդհանուր իրավասության դատարանի դատավճռով՝ Կարապետյանը դատապարտվել էր 3 ամիս ժամկետով ազատազրկման, սակայն նրա նկատմամբ պատիժը պայմանականորեն չի կիրառվել, քանի որ սահմանվել էր 1 տարի ժամկետով փորձաշրջան:

Դատավճռից դժգոհ մեղադրող դատախազը վերաքնիչ բողոք է ներկայացրել՝ պահանջով Ա.Կարապետյանի նկատմամբ պատիժ նշանակել 6 ամիս ժամկետով ազատազրկում:

Սակայն վերաքննիչ բողոքը մերժվել է՝ օրինական ուժի մեջ մնալով առաջին ատյանի դատարանի դատավճիռը: