Բաքվի առևտրի կետերից շատերը մանաթի հերթական արժեզրկման պատճառով դադարեցրել են աշխատանքը։ Փակվել են  նույնիսկ դեղատները , արժույթի փոխանակման կետերից շատերը, էլեկտրոնիկայի խանութները, որոշ տեղերում գներն արդեն բարձրացել են: Հավանաբար, դա կապված է թանկացումների հետ, հայտնում է contact.az-ը:

Մեծածախ վաճառքի ցանցերը դադարեցրել են ներմուծված ապրանքի վաճառքը: Մասնավորապես դադարեցվել է լիտվական Svalia կաթնամթերքի, ինչպես նաև ուկրաինական և բելառուսական ապրանքների վաճառքը, հայտնում է Haqqin.az-ը:

Բանկերը դադարեցրել են փոխանցումները: Դա անդրադարձել է նաև արտարժույթի հետ բանկային մյուս գործողությունների վրա, այդ թվում արժույթի փոխանակման:

Մանաթի փոխարժեքը կարող է էլ ավելի նվազել, քանի որ Ադրբեջանի կառավարությունը հաշվի չի առել պահանջարկի և առաջարկի հարաբերակցության հիմնարար գործոնները, չի ստեղծել իրական տնտեսություն: Արդյունքում կտրուկ նվազել է արտաքին առևտրի դրական սալդոն և արժույթի մուտքը երկիր, գրում է contact.az-ը:

Ադրբեջանի կենտրոնական բանկը 2015-ի դեկտեմբերի 21-ից անցել է մանաթի լողացող փոխարժեքի: Մանաթի պաշտոնական փոխարժեքը դոլարի և եվրոյի համեմատ նվազել է գրեթե կիսով չափ: Դեկտեմբերի 18-ին 1 դոլարի արժեքը 1,05 մանաթ էր, իսկ դեկտեմբերի 21-ին արդեն` 1,55 մանաթ: 1 եվրոյի արժեքն է 1,68 մանաթ: