massispost.com-ը գրում է. Բելգիայի «Հումանիստական ժողովրդական կենտրոն» կուսակցությունը (CDH) որոշում է կայացրել իր շարքերից հեռացնել ազգությամբ թուրք պատգամավոր Մահինուր Օզդեմիրին՝ Հայոց ցեղասպանության փաստը ժխտելու համար:

Կուսակցության նախագահ Բենոիթ Լոթգենը ողջունել է էթիկայի հանձնաժողովի որոշումը. «Քաղաքական հանձնառությունը պահանջում է մեր կողմից որդեգրված արժեքների հանդեպ լիարժեք հավատարմություն»:

Ավելի վաղ նա ասել էր, որ եթե կուսակցությունում Ցեղասպանությունը ժխտող որևէ մեկը գտնվի, կապ չունի՝ կին, թե տղամարդ, անմիջապես հեռացվելու է շարքերից: Թուրք պատգամավորը, որը առաջինն էր, որ բելգիական խորհրդարան է մտել գլխաշորով, խախտել էր 2015թ.-ի գարնանը Հայոց ցեղասպանության զոհերի հիշատակի հարգման մեկրոպեանոց լռությունը՝ հայտարարելով, թե «Եվրոպական խորհրդարանի կողմից ընդունված բանաձևը պարտադիր բնույթ չի կրում»: Հետագայում նա հրաժարվել էր ստորագրել հանձնաժողովի նախագահի կողմից ընդունված Հայոց ցեղասպանությունը ճանաչող բանաձևը:

Օզդեմիրը բողոքարկել էր կուսակցության որոշումն ու պահանջել կուսակցության նախագահից հրաժարվել նրան ազատելու մտքից՝ բնորոշելով այդ որոշումը որպես անօրինականության և խտրականության դրսևորում: