Կուտակված զենքը ուղղված չի եղել Հայաստանի և Հայաստանի քաղաքացու դեմ: Այդ մասին այսօր «Ազատության» հետ զրույցում վստահեցրեց նոյեմբերի 25-ին ձերբակալված, ապակալանավորված Արթուր Վարդանյանի փաստաբան Լևոն Բաղդասարյանը։

Նշենք, որ 34-ամյա Վարդանյանը, ով, Ազգային անվտանգության ծառայության (ԱԱԾ) պնդմամբ, ղեկավարել է բացահայտված հանցավոր խումբը, մեղադրվում է հանցավոր համագործակցություն ստեղծելու կամ ղեկավարելու և ապօրինի զենք պահելու համար, որը կատարվել է կազմակերպված հանցավոր խմբի կողմից:

Ազգային անվտանգության ծառայության տվյալներով, երիտասարդը, վերադառնալով Իսպանիայից, այս տարվա ապրիլին սկսել է հանցավոր խումբ ձևավորել՝ հավաքագրելով հիմնականում չաշխատող քաղաքացիների:

ԱԱԾ պնդմամբ, խումբը ծրագրել էր Հայաստանում նախադեպը չունեցող հանցագործությունների շարք, այդ թվում՝ պետական գործիչների սպանություններ:

Մինչդեռ Վարդանյանի փաստաբանը պնդում է. — «Գրոհի ժամանակ, այո՛, տանը եղել է զենք-զինամթերք, դա հանրահայտ փաստ է։ Դրանից ավել բան չեմ կարող ասել։ Բայց միևնույն ժամանակ նաև պետք է փաստենք, որ նմանօրինակ զենքի առկայության պայմաններում, եթե չի եղել բացարձակ դիմադրություն, որը կաշկանդված չէին, կարող էին անել, կարող էր իմ պաշտպանյալը մասնավորապես անել, ապա կարծում եմ, որ դա նշանակում է, որ այդ զենքը ուղղված չի եղել Հայաստանի Հանրապետության դեմ, Հայաստանի Հանրաապետության քաղաքացու դեմ»։

Հարցին, թե գուցե Ազգային անվտանգության ծառայության աշխատակիցները նրանց հանկարծակիի են բերել, և այդ պատճառո՞վ դիմադրություն չի եղել, Բաղդասարյանը պատասխանեց. — «Գիտեք, կարելի է ցանկացած քննչական փորձառություն կատարել և տեսնել՝ ցանկացած անակնկալ գրոհի ժամանակ որքան ժամանակ է անհրաժեշտ, որպեսզի այդ զենքը գործադրվեր։ Ավելին՝ նկարահանման ժամանակ, որը սփռվեց մամուլում և հեռուստատեսությամբ, այնտեղ ցույց էին տալիս, որ պահունակի մեջ նաև եղել են համապատասխան փամփուշտներ, այսինքն` եթե պատրաստի վիճակում է դա եղել, ցանկացած քննչական փորձառություն կտա դրա պատասխանը, թե քանի վայրկյան էր անհրաժեշտ գոնե մեկ կրակոց արձակելու համար։ Բացարձակ մեկ կրակոց անգամ չի արձակվել, որը, վստահ եմ, իմ ներքին համոզմունքն է նաև, որ չէր կարող ուղղված լինել դեպի Հայաստանի Հանրապետություն կամ Հայաստանի Հանրապետության քաղաքացու դեմ»։

azatutyun.am