ՌԴ գյուղատնտեսության նախարար Ալեքսանդր Տկաչովը հայտարարել է, որ թուրքական գյուղմթերքի մոտ 15 տոկոսը չի համապատասխանում ռուսական նորմերին: Հաղորդագրությունը տեղադրվել է նախարարության կայքում։ «Ստիպված եմ արձանագրել, որ 2015-ի տարեսկզբից գրանցվել է կենդանական ծագման թուրքական արտադրանքում վնասակար և արգելված նյութերի մնացորդների բացահայտման մոտ 40 դեպք,- ասել է ՌԴ գյուղնախարար Տկաչովը:

Խախտումներ են հայտնաբերվել նաև մրգերոմ և բանջարեղենում` գերազանցված է պեստիցիդների, նիտրատների և նիտրիտների թույլատրելի քանակը, ասել է Տկաչովը, հայտնում է «Դոժդը»:

«Ներկայում ուժեղացված լաբորատոր վերահսկողության ռեժիմ է գործում թուրքական երկու ձեռնարկությունների հանդեպ, վեցում սահմանվել է ժամանակավոր սահմանափակումների ռեժիմ»,-ասվում է հաղորդագրության մեջ:

Նոյեմբերի 25-ի առավոտյան հայտնի է դարձել, որ Ռոսսելխոզնադզորը արգելք է դրել թուրքական Standart Gida Sanayi ve Ticaret Anonim Sirkorti ձեռնարկության կողմից թռչնամսի ներկրման վրա, քանի որ դրանում լիստերիաներ (ձողաձև բակտերիաների տեսակ) են հայտնաբերվել:

Նույն օրը երեկոյան, ինչպես գրում է «Վեդոմոստի» թերթը, թուրք մի շարք ներկրողներ մաքսային ձևակերպման հարցում դժվարությունների են առերեսվել:

Նախօրեին «Կոմերսանտին» հայտնի դարձավ, որ Ռուսաստանը կարող է սահմանափակել ապրանքների ներկրումը Թուրքիայից: Ձուկ ներկրողներից մեկը հայտնել է, որ մաքսակետում հետ են ուղարկում որոշ մեքենաներ: