ԱԺ-ում քննարկվում է ԵՏՄ տարածքում ապրանքների տեղափոխման եւ ներմուծման մասին արձանագրությունը վավերացնելու հարցը:
ԵՏՄ-ին առնչվող միջազգային մի համաձայնագրի քննարկման ժամանակ   Զ.Փոստանջյանը կոչ արեց դեկտեմբերի 1-ին քաղաքական ու քաղաքացիական անհնազանդություն սկսել Ազատության հրապարակում. մեկ շաբաթ մնալ այնտեղ ու հաղթել. «Մեկ շաբաթ  կարելի է  չգնալ տուն, մեկ շաբաթ կարելի քաղցած մնալ,  կարող  ենք, այո՛, ցրտից մրսել»։ Նա առաջարկեց նաև չմուծել կարմիր գծերի ու  արագաչափերի տուգանքները:

Զարուհի Փոստանջյանն անդրադարձավ արագաչափերի եւ կարմիր գծերի խնդրին՝ ասելով, որ այդ բիզնեսը պատկանում է Սերժ Սարգսյանի ընտանիքին. «Մենք այդ տուգանքները մուծելով՝ օգնում ենք բիրտ ուժին, որպեսզի նա ավելի ու ավելի մեզ ճնշի»:Գալուստ Սահակյանն անընդհատ միջամտում էր Զարուհի Փոստանջյանի ելույթին՝ հորդորելով մի քիչ էլ նախագծից խոսել։

ՀՀԿ-ական որոշ պատգամավորներ հունից դուրս եկան, երբ Զարուհի Փոստանջյանն անդրադարձավ ՀՀԿ-ական Լեւոն Մարտիրոսյանի հայտարարությանը. «Երբ ՀՀԿ-ական պատգամավորներն ասում են, որ մենք պետք է հանձնենք տարածքներ, սա արդեն ակնհայտ Սերժ Սարգսյանի դավաճան քաղաքականության հայտարարումն է, որին մենք պետք է վերջ տանք»: ՀՀԿ-ական կանանցից մեկը տեղից գոռաց՝ ամո՜թ, Զարուհի Փոստանջյանն էլ արձագանքեց . «Ամոթը ձեզ, որ նպաստում եք արտագաղթին, ամոթը ձեզ, որ  հավաքվել եք այստեղ ու պնդում եք» ։ ԱԺ նախագահ Գալուստ Սահակյանը բարկացավ, Զարուհին շեղվում էր բուն հարցից։ Վերջինս  Զարուհուն առաջարկեց դեղ խմել։

«Մի անգամ գոնե ողջամիտ ելույթ ունեցեք, ձեր ձայնագրությունը, ֆանագրաման, քանի որ միշտ նույնն է,   միշտ կտեղադրենք ժողովուրդը կլսի։ Ինչ-որ ժանրային բոլոր հնարավորություններից դուրս ելույթ է »,- նշեց Գալուստ Սահակյանը։