Յարգելի Պրն. Յակոբեան, Այս տարուան Մայիս 21ին, առանց որեւէ հիմնաւորման, Երեւանի Զուարթնոց օդակայանին մէջ՝ հայրենիք մուտքս արգիլուեցաւ: Աւելի քան 12 ժամ օդակայանին մէջ զիս «բանտարկելէ» յետոյ, հակառակ կամքիս, Ձեր պաշտօնեաները զիս նոյն օդանաւով վերադարձուցին Փարիզ: Զուարթնոցի տանջալից ժամերու ընթացքին անպատասխան մնացին իմ բոլոր հարցադրումներն ու արդարացի բողոքները: Միակ պատասխանը, որ տրուեցաւ Զուարթնոցի մէջ, անյարիր էր 21րդ դարու ժողովրդավարութեան բոլոր չափանիշներուն: «Վերեւից հրաման կայ, Ձեր մուտքը Հայաստան արգելուած է» յայտարարեց ապահովութեան աշխատակիցը եւ ինծի ընկերակցեցաւ վերադարձի օդանաւ: Մերժելով կամայական կամ թելադրուած որեւէ բռնարարք, որոշեցի կրկին ժամանել իմ թանկագին հայրենիք եւ Ամանորեայ եւ Ս. Ծննդեան տօները անցընել ընկերներուս եւ հարազատներուս հետ, հայրենի հողի վրայ: 2015 թուականի Մայիս 21ի անախորժ եւ մերժելի վիճակի կրկնութիւնը բացառելու համար կը փափաքիմ տեղեկանալ. Ինչո՞ւ արգիլուեցաւ ինծի Հայաստանի Հանրապետութիւն մուտք գործել: Եթէ այդ արգելքը դեռ ի զօրու է, ի՞նչ է ատոր հիմքը: Եթէ իմ դէմ սահմանուած այդ ապօրինի արգելքը արդէն վերցուած է, կը խնդրեմ գրաւոր տեղեկացնել, որպէսզի կարենամ գալ Մայր հայրենիք: Հայրենիքը ինծի համար պաշտելի է, բայց կ՚ատեմ այն վարչակարգը, որ կ՚աւերէ Հայոց Հանրապետութիւնը եւ արիւնաքամ կ՚ընէ մեր ժողովուրդը:

Յարգանքներով` Jean Baptiste OZKIRISYAN (Շանթ Ոսկերիչեան) Ֆրանսա, Փարիզ, 23 Նոյեմբեր 2015