Գործող Սահմանադրության 38-րդ հոդվածում նշված է, որ «Յուրաքանչյուր ոք ունի անվճար հիմնական բժշկական ծառայություններ ստանալու իրավունք: Դրանց ցանկը և մատուցման կարգը սահմանվում են օրենքով»:

Սահմանադրության փոփոխությունների նախագծի 85-րդ հոդվածի համաձայն, այդ հոդվածը վերափոխված է այսպես` «1. Յուրաքանչյուր ոք, օրենքին համապատասխան, ունի առողջության պահպանման իրավունք: 2. Օրենքը սահմանում է անվճար հիմնական բժշկական ծառայությունների ցանկը և մատուցման կարգը»:

Քաղաքական գործիչ, «Ոչ»-ի քարոզիչ Գուրգեն Եղիազարյանին, ՄԱՄՈՒԼ.am-ի թղթակիցը խնդրեց մեկնաբանել, թե ինչպիսի փոփոխությունների է ենթարկվել Սահմանադրությունում քաղաքացիների անվճար բուժօգնություն ստանալու մասին հոդվածը և արդյոք, «պետպատվեր» հասկացությունը հանվա՞ծ է:

Մեր հարցին ի պատասխան՝ Գ. Եղիազարյանն ասաց, որ իսկապես, նոր Սահմանադրությունում, «պետպատվեր» հասկացությունն այլևս գոյություն չունի: «Պետպատվերը հանված է, և այդ մասին ոչինչ գրված չէ: Հաջորդ տողում էլ գրված է, որ հետագայում օրենքով կկարգավորվի այդ խնդիրը, ոչ թե մայր Սահմանադրությամբ: Այս առումով սա արդեն վտանգված է: Ինչո՞ւ է վտանգված, որովհետև գիտենք, որ մայր օրենքը Սահմնադրությունն է»,- պարզաբանեց նա:

Հարցին պարզաբանում տվեց նաև ՀՀԿ-ական պատգամավոր Սուքիաս Ավետիսյանը: « Տարեցտարի պետպատվերին ուղղված գումարներն ավելանում են և, այդ առումով, ես չեմ կարծում, որ որևէ մեկի մտքով անցնի Սահմանադրությունից այն հանել: Եթե խնդիրներ էլ առաջանան` ԱԺ-ն կլուծի: Այն, որ այդ մասին Սահմանադրության մեջ հստակ չի գրված, դա չի նշանակում, որ այդ կետը հանված է»: