Օգոստոսին Հայաստան եկած բոստոնաբնակ Պեպանյանների  ընտանիքին Սուրեն Սարկավագ Գևորգյանն ուղեկցել էր Գյումրի: Նրանք այցելել էին նաև տնակային պայմաններում գործող մտավոր թերզարգացում ունեցող երեխաների թիվ 3 հատուկ դպրոց:

Ընտանիքի 16- ամյա դուստրը՝ Անին, ԱՄՆ վերադառնալուց հետո դպրոցի անմխիթար վիճակի մասին իր տպավորությունները պատմել էր ազգականին՝ Թուրքիայում ծնված, այժմ Բոստոնում բնակվող Մանուկ Տէյիրմէնճիյանին: 28- ամյա երիտասարդը, որ երբեևէ չի եղել Հայստանում, որոշել է ներդրում կատարել  և վերանորոգել դպրոցը, իսկ մայիսին նա խոստացել է գալ հայրենիք:

Շնորհիվ նաև Սուրեն սարկավագի ջանքերի՝  նոյեմբերի 20-ին Գյումրու թիվ 3 հատուկ դպրոցը նշեց իր նորամուտը՝ հյուրերին դիմավորելով նորացված ու կարուսելներով համալրված  խաղահրապարակի՝ «Մանուկի այգու» մուտքի մոտ: «Վերանորոգումը, խաղահրապարակի և համակարգչային դասարանի կառուցումը հնարավորություն տվեցին, որ երեխաները սովորեն վերանորոգված սենյակներում և մաքուր ննջարաններում գիշերեն: Խաղահրապարակը հնարավորություն տվեց, որ խաղերի միջոցով նրանք իրենց օրը հետաքրքիր անցկացնեն», — ասում է Սուրեն սարկավագը:

Դպրոցի սաներին  համակարգչային դասարան ունենալու հարցում ևս Սուրեն սարկավագի նախաձեռնությունը արդյունավետ է եղել.  ՀՀ Ազգային անվտանգության խորհրդի աշխատակազմը 12 համակարգիչ է նվիրել դպրոցին:

Հյուրերին ողջունելով Շիրակի փոխմարզպետ Հարություն Արշակյանը հույս հայտնեց, որ երեխաներն ու դպրոցի կոլեկտիվը ամեն ինչ կանեն ստացած նվերները լավ պահպանելու համար: