«Տրանսպորտի և կապի նախարարն իր գործընկերոջ հետ կազմակերպեց հատուկ չվերթ դեպի Հայաստան: Այսօր՝ ժամը 20:00-ին, ինքնաթիռով կտեղափոխվեն այն բոլոր տուժածները, որոնց առողջությունը թույլ է տալիս և կտեղափոխվեն աճյունները: Ծախսերը կհոգա կառավարությունը, ևս 12 անձ մնում է բուժումը շարունակելու Տուլայի մարզում», – ասաց տրանսպորտի և կապի փոխնախարար Արթուր Առաքելյանը՝ խոսելով նոյեմբերի 3-ին Տուլայի մարզում տեղի ունեցած վթարի մասին, որի հետևանքով զոհվել էր 8 ՀՀ քաղաքացի, վիրավորվել 43-ը:

Առաքելյանը նշեց, որ Տուլայում գտնվող առողջապահության նախարար Արմեն Մուրադյանն ու տրանսպորտի և կապի նախարար Գագիկ Բեգլարյանն  այցելել են բոլոր հիվանդներին և տեղեկացել իրավիճակից:

«Հետաքննություն է տեղի ունենում, որի արդյունքում ի հայտ կգան վթարի մեղավորները, կիմանաք՝ ինչ պառճառներով է դեպքը տեղի ունեցել ու այստեղից էլ համապատասխան հետևություններ կանենք»,-ասաց փոխնախարարն՝ ընդգծելով , որ օրենսդրության մեջ ուղևորափոխադրման մասով փոփոխություններ են առաջարկվում, որը կապ չունի դեպքի հետ. արդեն շուրջ կես տարի առաջարկություններ են քննարկվում: Փոխնախարարի խոսքով՝ նոր օրենսդրությունը ենթադրում է մի փոքր ավելի վերահսկողություն: