Այդուհանդերձ հոկտեմբերի 10-11-ին  տեղի կունենա «Էրեբունի-Երևան 2797» տոնակատարությունը՝ գունեղ, տոնական, մշակութային ծրագրերով լեցուն. այսօր հրավիրված ասուլիսին հայտարարեց Երևանի քաղաքապետի տեղակալ Արամ Սուքիասյանը: Նա տեղեկացրեց, որ ծրագիրը եռամսյա ջանքի արդյունքն է, այսինքն` նախապատրաստական աշխատանքները սկսվել են երեք ամիս առաջ և արդեն իսկ ավարտման վերջնական փուլում են:

Տոնակատարության ծրագրերին հատկացված բյուջեն, ըստ փոխքաղաքապետի, ինչպես նախորդ տարի, այս տարի էլ 130 մլն դրամ է: Ծախսերում բացի այդ կան նաև նվիրատվություններ, իսկ թե որքան՝ այդ պահին նա չէր կարող հնչեցնել։ Հրավիրված հյուրերի մասով նա նշեց, որ Երևան կգան 20 պատվիրակություններ, ավելի քան 60 հոգով, որոնց թվում կլինեն տարբեր քաղաքի քաղաքապետեր:

«Ինչ վերաբերում է քննարկվող հարցերին, Երևան համայնքը իր լիազորություններն ունի կոնկրետ սահմանված օրենքով, և դա պայմանավորված է Երևան քաղաքի վարչական տարածքային սահմաններով: Քաղաքապետարանն իր բյուջեն կարող է օգտագործել քաղաքի հետ կապված այս կամ այն խնդիրը լուծելու համար: Որոշ նվիրատուներ ինչ-ինչ գումար են հատկացնում, դրանք նպատակային են, և բարոյական իրավունք չունենք նպատակային տրված գումարը մեկ այլ նպատակի տալ: Որքան էլ բոլորի համար հարցը այդ մտահոգիչ լինի, այդուհանդերձ այն քաղաքի սահմաններից դուրս է»,-ասաց նա և հավելեց, թե կոչ են անում բարեգործություն անել, որի իրավունքը Երևանի քաղաքապետարանը չունի:
Բուն միջոցառումը կսկսվի «Երևանում տոն է» ծրագրով: Հաջորդող օրը ավանդական միջոցառումներ նաև կլինեն, որոնք կմեկնարկեն ջրցան մեքենաներով, կլինի հուշարձանների լվացում, և այլն: Նա առանձնացրեց «Ավելի լավ Երևան» վերնագիրը կրող էքսպո ցուցահանդեսը, որտեղ կներկայացվեն Երևան քաղաքի տեսլականի հետ կապված նախագծեր, մակետներ, բազմաթիվ նմուշներ:
«Էրեբունի-Երևան» միջոցառման պաշտոնական միջոցառումը կլինի 11-ին՝ Քաղաքապետարանի դիմաց: Համերգը կամփոփվի տոնական հրավառությամբ, որից  կլինի դիսկոտեկա: