Հայաստանի ՊՆ «Բաղրամյան» զորավարժարանում այսօր մեկնարկել է ՀԱՊԿ Հավաքական խաղաղապահ ուժերի «Անխախտելի եղբայրություն 2015» զորավարժությունը, որը կավարտվի հոկտեմբերի 4-ին:

Հայաստանի ԶՈւ Գլխավոր շտաբի պետ, գեներալ-գնդապետ Յուրի Խաչատուրովը, լրագրողների հետ զրույցում խոսելով վերջին օրերին հայ-ադրբեջանական սահմանին լարված իրավիճակի մասին, ասաց, որ Հայաստանն ի վիճակի է համարժեք պատասխան տալու Ադրբեջանի սադրանքներին. «Խաղաղապահ ուժերի տեղակայման անհրաժեշտություն չկա: Մենք ինքներս էլ կարող ենք լիովին զսպել սադրանքները, որոնց ամեն օր դիմում է Ադրբեջանը:

Միայն վերջին 15 օրվա ընթացքում ադրբեջանական կողմը մի քանի հազար արկ եւ ական է օգտագործել, որոնք պայթել են հայկական խաղաղ բնակավայրերում, դիրքերում, թիկունքում՝ առաջնագծից 10 կմ հեռավորության վրա, հիշեցրեց Յուրի Խաչատուրովը՝ շեշտելով, որ համարժեք պատասխան է տրվել եւ հակառակորդն ունի լուրջ կորուստներ:

Ի տարբերություն, սակայն, ադրբեջանական բանակի, Հայաստանի ԶՈւ-ը չի գնդակոծում գյուղերը, շեշտեց Հայաստանի ԶՈՒ-ի գլխավոր շտաբի ղեկավարը:

Նա տեղեկացրեց, որ Հայաստանի ՊՆ ներկայացուցիչներն այցելում են սահմանամերձ գյուղեր, հանդիպում բնակիչների հետ, հայտնում են ձեռնարկվող միջոցառումների մասին։ Միջադեպերն ամբողջովին բացառելն էլ հնարավոր չէ, քանի որ հակառակորդը ականանետեր եւ հաուբիցներ է կիրառում: Թեպետ հայկական կողմը Ադրբեջանին բազմիցս առաջարկել է հետ քաշել դիպուկահարներին, հետաքննություն անցկացնել քաղաքացիական անձանց սպանության յուրաքանչյուր գործով, սակայն Ադրբեջանը հրաժարվում է։

Անդրադառնալով այդ ամենին ՀԱՊԿ համապատասխան արձագանքի բացակայությանն առնչվող հարցին՝ գեներալ-գնդապետը նշեց, որ դա, իրոք, ցանկալի է, սակայն դեռ լուրջ արձագանք չկա։ «Մենք նույն անվտանգության համակարգում ենք, օգնություն դեռ չենք խնդրում, բայց զուտ մարդկային աջակցությունը ցանկալի է»,- հավելեց Յուրի Խաչատուրովը:

Նշենք, որ զորավարժություններին մասնակցում են ՀԱՊԿ հավաքական խաղաղապահ ուժերի կազմում ընդգրկված Հայաստանի, Բելառուսի, Ղազախստանի, Ղրղզստանի, Ռուսաստանի եւ Տաջիկստանի զինված ուժերի, ոստիկանության ստորաբաժանումները, ընդհանուր առմամբ, շուրջ 500 զինծառայող եւ մոտ 50 անուն զինտեխնիկա: