Սեպտեմբերի 24-25-ը Սանկտ Պետերբուրգում տեղի ունեցած Կանանց առաջին եվրասիական համաժողովի ժամանակ «հակամարտություն» է գրանցվել նաև հայաստանցի ու ադրբեջանցի պատվիրակների միջև: Հայաստանյան պատվիրակությունը, հիշեցնենք, գխավորում էր ԱԺ փոխնախագահ Հերմինե Նաղդալյանը: Պատվիրակության կազմում էին ԱԺ պատգամավորներ Նաիրա Զոհրաբյանը, Ռուզաննա Մուրադյանը, Լյուդմիլա Սարգսյանը, պետական կառավարման եւ հասարակական տարբեր ոլորտներում ակտիվորեն ներգրավված կանայք:

Լիագումար նիստում, կանացի հիմնախնդիրներին նվիրված իր ելույթում ԱԺ փոխնախագահ Հերմինե Նաղդալյանն ընդհանրական անդրադարձ է կատարել հակամարտություններին` նշելով, որ դրանցից ևս կանայք են տուժում, քանզի նրանց որդիներն ու ամուսիններն են վիրավորվում, մահանում: Հերմինե Նաղդալյանի ելույթին, տեղից բավական ակտիվ փորձել են հակադարձել Ադրբեջանի պատվիրակության անդամները: Նրանցից մեկն էլ շպրտել է. «Այդքան մտահոգ եք, ձեր տղամարդկանց մի թողեք կրակեն»:

Հայ և ադրբեջանցի կանանց «հակամարտությունը» շարունակվել է քաղաքական պլատֆորմի քննարկումների ժամանակ: Ֆորումի վարողներից մեկն էլ ՀՀ պատվիրակության ղեկավար Հերմինե Նաղդալյանն է եղել: Մտնելով դահլիճ, հայկական պատվիրակության անդամները տեսել են, որ նախագահությունում նստած է նաև Ադրբեջանի պատվիրակության ղեկավարը: Ծրագրով, սակայն, նախատեսված չի եղել, որ ադրբեջանցի պատվիրակը ևս պետք է նախագահությունում տեղ զբաղեցնի: Հայաստանի պատվիրակության անդամները պահանջել են, որ հարգվեն ու պահպանվեն նախապես մշակված խաղի կանոնները և լքել են դահլիճը` անտեսելով կատարվածն արհամարհելու և  քննարկումը սկսելու բոլոր հորդորները: Վեճի արդյունքում ի հայտ է եկել, որ Վալենտինա Մատվիենկոյի օգնականներից մի տղամարդ է ադրբեջանուհուն օգնել` նախագահությունում «աթոռ ունենալու» հարցում: Լուրը հասել է Վալենտինա Մատվիենկոյին, որն այդ քննարկմանը չի մասնակցել` այլ հանդիպումների պատճառով: Կատարվածից տիկին Մատվիենկոն բավական զայրացել է ու հրահանգել ադրբեջանուհուն` իջնել նախագահությունից և  տեղ զբաղեցնել դահլիճում` նախապես իր համար նախատեսված շարքում: Հայ-ադրբեջանական այս «հակամարտության» արդյունքում, քաղաքական պլատֆորմի քննարկումները մեկ ժամ ուշացումով են սկսվել: